കോഴിക്കോട്: തന്റെ രാഷ്ട്രീയ ജീവിതത്തിന്റെ ബാലപാഠങ്ങള്ക്ക് തുടക്കം കുറിച്ച കോഴിക്കോടിന്റെ മണ്ണിലൂടെ ബിജെപിയുടെ മുതിര്ന്ന നേതാവും മുന്കേന്ദ്രമന്ത്രിയുമായ ഒ.രാജഗോപാലിന്റെ തെരഞ്ഞെടുപ്പ് പര്യടനം. ഇന്നലെ കോഴിക്കോട്ടെത്തിയ അദ്ദേഹത്തിന് തിരക്കിട്ട പരിപാടികളായിരുന്നു. രാവിലെ ചാലപ്പുറം സിറ്റി കോ-ഓപ്പറേറ്റീവ് ബാങ്ക് ഓഡിറ്റോറിയത്തില് നടന്ന കുടുംബസംഗമം, മലാപ്പറമ്പ് ഹൗസിംഗ്കോളനി പരിസരത്ത് നടന്ന വികസനസദസ്സ്, കോഴിക്കോട് പ്രസ്ക്ലബില് മീറ്റ് ദ പ്രസ്, കൊയിലാണ്ടിയിലും വടകരയിലും പൊതുയോഗങ്ങള് എന്നിവയായിരുന്നു പരിപാടികള്.
രാവിലെ 9 മണിക്ക് ചാലപ്പുറത്ത് നടന്ന കുടുംബസംഗമത്തില് വി.യു.ഏറാടി ഹാരാര്പ്പണം നടത്തി. ടി.എം.ബാലകൃഷ്ണന് ഏറാടി അധ്യക്ഷത വഹിച്ചു. ആഴ്ചവട്ടം ബിജെപി സ്ഥാനാര്ത്ഥി സജിത, ചാലപ്പുറം സ്ഥാനാര്ത്ഥി സി.പി. വിജയകൃഷ്ണന് എന്നിവര് പ്രസംഗിച്ചു. കേരളത്തില് ബിജെപിക്ക് എതിരായ സാമ്പാര് മുന്നണി രൂപപ്പെട്ടിരിക്കുകയാണെന്ന് അദ്ദേഹം പറഞ്ഞു. എല്ലാവര്ക്കും വികസനം എന്നുള്ളതാണ് നരേന്ദ്രമോദി സര്ക്കാറിന്റെ പ്രഖ്യാപിത ലക്ഷ്യം. കേരളത്തെ വികസനത്തിന്റെ മുഖ്യധാരയില് നിന്നും അകറ്റിനിര്ത്താനുള്ള രാഷ്ട്രീയ അയിത്തം അവസാനിപ്പിക്കണം. ബിജെപിയുടെ കടന്നുവരവിന് വേണ്ടി ഈ തെരഞ്ഞെടുപ്പോടെ കളമൊരുക്കണം. അദ്ദേഹം പറഞ്ഞു.
മലാപ്പറമ്പ് ഹൗസിംഗ്കോളനിയില് നടന്ന വികസന സദസില് ബിജെപിയുടെ പ്രഖ്യാപിത ലക്ഷ്യങ്ങളെക്കുറിച്ചും വികസന സമീപനത്തെകുറിച്ചും അദ്ദേഹം വിശദീകരിച്ചു. സോഷ്യലിസം ഒരാശയമെന്ന നിലയില് മണ്ണടിഞ്ഞുവെന്നും ഈ തെരഞ്ഞെടുപ്പില് സോഷ്യലിസത്തെകുറിച്ചുള്ള അവകാശവാദങ്ങളൊന്നും ഇല്ലെന്നും അദ്ദേഹം ചൂണ്ടിക്കാണിച്ചു. മതേതരത്വമെന്നത്ത് ഭരണഘടനാഭേദഗതിയിലൂടെ കോണ് ഗ്രസ് ആവിഷ്ക്കരിച്ച നയമല്ല. മറിച്ച് ഭാരതത്തിന്റെ സംസ്കൃതിയുടെ ഭാഗമാണ് സര്വ്വധര്മ്മ സമഭാവന.അവസാനത്തെ വരിയിലെ അവസാനത്തെ ആളിന് വികസനത്തിന്റെ ഗുണഫലമെത്തിക്കുക എന്നതാണ് ബിജെപിയുടെ അടിസ്ഥാന സമീപനം.അദ്ദേഹം പറഞ്ഞു. പള്ളിപ്പുറത്ത് സേതുമാധവന് അധ്യക്ഷത വഹിച്ചു. ബി ജെപി നേതാക്കളായ പി.സി. മോഹനന്മാസ്റ്റര്, പി.രഘുനാഥ് എന്നിവര് സംസാരിച്ചു. പി.വിശ്വനാഥന് സ്വാഗതവും പി.വി.കൃഷ്ണകുമാര് നന്ദിയും പറഞ്ഞു.
തിരക്കിനടയിലും ചരിത്രകാരന് ഡോ. എം.ജി.എസ്. നാരായണന്റെ വീട്ടിലെത്തി സൗഹൃദം പുതുക്കാനും കുശലാന്വേഷണം നടത്താനും അദ്ദേഹം സമയം കണ്ടെത്തി. മലാപ്പറമ്പ് ഹൗസിംഗ് കോളനിയിലെ എംജിഎസിന്റെ വീട്ടില് അല്പ്പസമയം ചെലവഴിച്ചതിന്ശേഷം അദ്ദേഹം കൊയിലാണ്ടിയിലേക്ക് യാത്രയായി. ചേവരമ്പലം ഡിവിഷന് ബിജെപി സ്ഥാനാര്ത്ഥി ഇ.പ്രശാന്ത്കുമാറിനൊപ്പമാണ് അദ്ദേഹം എംജിഎസിന്റെ വീട്ടിലെത്തിയത്.
