കൊച്ചി: തദ്ദേശ സ്ഥാപനങ്ങളിലേക്കുളള തെരഞ്ഞെടുപ്പു പ്രചരണവുമായി ബന്ധപ്പെട്ട് ശബ്ദ മലിനീകരണമുണ്ടാക്കുന്നവിധം ഉച്ചഭാഷിണി ഉപയോഗിച്ചാല് കര്ശന നടപടിയെടുക്കാന് ജില്ല തെരഞ്ഞെടുപ്പ് ഓഫീസര്മാര്ക്ക് സംസ്ഥാന തെരഞ്ഞെടുപ്പ് കമ്മീഷന് നിര്ദ്ദേശം നല്കി. നിയമലംഘനം ശ്രദ്ധയില്പ്പെട്ടാല് മൈക്ക് ഓപ്പറേറ്ററുടെ ലൈസന്സ് റദ്ദാക്കി ഉപകരണങ്ങള് പിടിച്ചെടുക്കും.
പൊതു ജനങ്ങള്ക്ക് ശബ്ദ മലിനീകരണം സംബന്ധിച്ച് പരാതികള് ഉണ്ടെങ്കില് കളക്ടറേറ്റിലെ തെരഞ്ഞെടുപ്പ് റൂമില് അറിയിക്കാം. തദ്ദേശ തെരഞ്ഞെടുപ്പുമായി ബന്ധപ്പെട്ട് യോഗങ്ങള് നടത്തുന്നതിന് മൈക്ക് അനൗണ്സ്മെന്റ് ആവശ്യമെങ്കില് മുന്കൂട്ടി അനുവാദം വാങ്ങണം. ക്രമസമാധാന പാലനത്തിലും ഗതാഗത തടസം ഒഴിവാക്കുന്നതിനും ആവശ്യമായ നടപടി സ്വീകരിക്കുന്നതിന് പോലീസ് വകുപ്പിന് സാധ്യമാകത്തക്കവിധം യോഗം നടത്തുന്ന സ്ഥലവും സമയവും ബന്ധപ്പെട്ട രാഷ്ട്രീയ പാര്ട്ടി സ്ഥാനാര്ഥിയോ പാര്ട്ടി അധികാരികളോ പോലീസിനെ മുന്കൂട്ടി അറിയിക്കണം.
തെരഞ്ഞെടുപ്പ് യോഗങ്ങള് നടക്കുന്ന സ്ഥലങ്ങളില് നിശ്ചയിക്കപ്പെട്ട സമയത്തിന് രണ്ടുമണിക്കൂര് മുമ്പ് മാത്രമേ ഉച്ചഭാഷിണി പ്രവര്ത്തിപ്പിക്കാവൂ. യോഗം കഴിഞ്ഞാലുടന് ഓഫാക്കുകയും വേണം. ഉച്ചഭാഷിണികള്, മൈക്ക് സെറ്റ് തുടങ്ങിയവ ഉപയോഗിക്കുമ്പോള് വ്യവസായമേഖലയിള് 75-70 ഡെസിബലിനു ഇടയിലും, വാണിജ്യ മേഖലയില് 55നും 45നും ഇടയിലും, ആശുപത്രി, വിദ്യാലയങ്ങള് എന്നിവയുടെ 100 മീറ്റര് പരിധിയ്ക്കുളളിലെ നിശബ്ദ മേഖലയില് 50നും 40നും ഇടയിലും രാവിലെ ആറു മുതല് രാത്രി 10 വരെ മാത്രമേ ഉച്ചഭാഷിണികളും മൈക്രോഫോണുകളും മറ്റ് വാദ്യോപകരണങ്ങളും പ്രവര്ത്തിപ്പിക്കാവൂ.
