ഏലംകുളം: അടിതെറ്റിയാല് ആനയും വീഴും എന്ന പഴഞ്ചൊല്ല് അതേപടി നടപ്പിലാവുകയാണ് ഏലംകുളത്ത്. ഇവിടെ അടിതെറ്റുന്നതാകട്ടെ ചങ്കൂറ്റം ഏറെയുണ്ടെന്ന് വീമ്പിളക്കുന്ന സിപിഎമ്മിനും. മോഹനന് ചെറുകര എന്ന തങ്ങളുടെ തന്നെ മുന്മെമ്പറുടെ മുമ്പിലാണ് സിപിഎമ്മിന് മുട്ടിടിക്കുന്നത്. കാരണം, ജീവിച്ചിരിക്കുന്ന ടിപിയാണ് മോഹനന് ചെറുകര. ഏലംകുളത്ത് പാര്ട്ടിയുടെ നാവായിരുന്ന ഇദ്ദേഹം അവിചാരിതമായാണ് പാര്ട്ടിയില് നിന്ന് രാജിവെച്ചത്. അതിന് അദ്ദേഹം പറഞ്ഞ കാരണം ‘അനാരോഗ്യം’ എന്നും. എന്നാല് തികച്ചും ആരോഗ്യവാനായ അദ്ദേഹം രാജിവച്ചത് പാര്ട്ടിയുടെ അനാരോഗ്യം കാരണമാണെന്നാണ് സിപിഎമ്മിലെ തന്നെ അദ്ദേഹത്തിന്റെ സുഹൃത്തുക്കള് പറയുന്നത്. കഴിഞ്ഞ ഭരണസമിതിയില് മൂന്നാം വാര്ഡിലെ മെമ്പറായിരുന്ന അദ്ദേഹം ഡിസംബറില് രാജിവെച്ചു. പിന്നീട് നടന്ന ഉപതെരഞ്ഞെടുപ്പില് സിപിഎം ഒരുവിധം കടന്നുകൂടി. എന്നാല് വീണ്ടും ഒരു തെരഞ്ഞെടുപ്പിന് നാട് ഒരുങ്ങിയപ്പോള് സിപിഎം ഏറ്റവും കൂടുതല് ഭയപ്പെടുന്നതും അവരുടെ മുന് നേതാവിനെ തന്നെ. പാര്ട്ടിക്ക് അകത്തുള്ള സഖാവ് മോഹനനെക്കാള് ശക്തന് പാര്ട്ടിക്ക് വെളിയിലുള്ള സഖാവ് മോഹനനാണെന്ന് ഇവര്ക്ക് നന്നായി അറിയാം. ഈ ഭയം, ഭീഷണിക്ക് വഴിമാറുന്ന കാഴ്ചയാണ് ഇപ്പോള് കാണുന്നത്. മോഹനന് ചെറുകരയുടെ വീടിന് മുമ്പില്”വൈരുദ്ധ്യാത്മ ഭൗതീകവാദ സിദ്ധാന്തങ്ങള്’ എഴുതി പക തീര്ക്കുകയാണ് ”ചില പ്രവര്ത്തകര്.
‘വര്ഗ്ഗ വഞ്ചകാ’, ‘കുലം കുത്തി’ തുടങ്ങിയ പ്രയോഗങ്ങളാണ് എവിടെയും. പോരാത്തതിന് ദിനംപ്രതി ഭീഷണിയുടെ സ്വരത്തിലുള്ള ഫോണ്കോളുകളും. തന്റെ വീട്ടുകാര്ക്ക് പോലും മനസമാധാനത്തോടെ ജീവിക്കാന് കഴിയുന്നില്ലെന്ന് ഈ സഖാവ് പറയുന്നു. എന്തായാലും മൂന്നാം വാര്ഡിലെ പ്രധാന തെരഞ്ഞെടുപ്പ് വിഷയം ‘മോഹനന് ചെറുകര ‘ തന്നെ. ഇക്കുറി വനിതാസംവരണ വാര്ഡായ ഇവിടെ തീപാറുന്ന മത്സരമാണ് നടക്കുന്നത്.
