കൊച്ചി: എറണാകുളം സേവാഭാരതി ജില്ലാ ജനറല് ആശുപത്രി ഒപി പരിസരത്ത് നടത്തിവരുന്ന സൗജന്യ പ്രഭാത ഭക്ഷണ വിതരണത്തില് പങ്കാളികളായി എളമക്കര സരസ്വതി വിദ്യാനികേതന് സ്കൂളിലെ വിദ്യാര്ഥികള് എത്തി. സ്കൂളില് വെച്ചിരിക്കുന്ന സേവാഭാരതിയുടെ 2 ഹുണ്ഡികയില് സ്കൂളിലെ വിദ്യാര്ഥികളും അദ്ധ്യാപകരും സ്റ്റാഫും എല്ലാവരും നിക്ഷേപിക്കുന്ന തുക സേവാഭാരതിക്ക് നല്കിയാണ് സ്കൂള് മാതൃകയായത്.
രണ്ട് ദിവസത്തെ ഭക്ഷണ വിതരണ തുകയാണ് സ്കൂള് നല്കിയത്. ഒക്ടോബര് 1, 2 ദിവസങ്ങളിലായാണ് സ്കൂള് ഭക്ഷണ വിതരണത്തില് പങ്കാളികളായത്. വരും നാളുകളിലും ഇത് തുടരുമെന്നും വിദ്യാര്ഥികള്ക്കൊപ്പമെത്തിയ സ്കൂള് പ്രിന്സിപ്പല് ദേവന് മാഷ് പറഞ്ഞു. വിദ്യാര്ത്ഥികള്ക്ക് ലഭിക്കുന്ന ചെറിയ തുകകള് ബാഹ്യപ്രേരണയിലാതെയാണ് സേവാഭാരതി ഹുണ്ടികയില് സമര്പ്പിക്കുന്നത്. കുട്ടികളിലെ സേവന മനോഭാവം വളര്ത്തുവാന് ഇത് ഉപകാരപ്പെടും എന്നും പ്രിന്സിപ്പല് പറഞ്ഞു. ആര്എസ്എസ് ജില്ലാ കാര്യവാഹ് രാജേഷ് ചന്ദ്രന്, സേവപ്രമുഖ് മണികണ്ഠന്, എറണാകുളം നഗര് കാര്യവാഹ് സുരേഷ് കുമാര്,സേവാഭാരതി പ്രവര്ത്തകരായ ജയചന്ദ്രന്,അജയന്, ഉമേഷ് തുടങ്ങിയവരും പങ്കെടുത്തു
