പൊന്‍കുന്നം: ബിജെപി ചിറക്കടവ് പഞ്ചായത്ത് കമ്മറ്റിയുടെ നേതൃത്വത്തില്‍ നടത്തുന്ന ശ്രീധരീയം ഭവനദാന പദ്ധതിയുടെ ഭാഗമായി നിര്‍മ്മിച്ചു നല്‍കുന്ന മൂന്നു വീടുകളുടെ താക്കോല്‍ദാനം ഇന്ന് നടക്കും. പൊന്‍കുന്നം രാജേന്ദ്രമൈതാനത്ത് ഉച്ചകഴിഞ്ഞ് 3.00ന് നടക്കുന്ന സമ്മേളനത്തില്‍ സിനിമാതാരം ഭരത് സുരേഷ്‌ഗോപി താക്കോല്‍ദാനം നിര്‍വ്വഹിക്കും. ദീനദയാല്‍ ചാരിറ്റബിള്‍ സൊസൈറ്റിയുടെ സഹകരണത്തോടെ നടത്തുന്ന ദീനദയാല്‍ റൂറല്‍ ഡെവലപ്‌മെന്റ് പ്രോജക്ടില്‍ ഉള്‍പ്പെടുത്തിയാണ് ശ്രീധരീയം ഭവനപദ്ധതി ആരംഭിച്ചത്. ശ്രീധരീയത്തിന്റെ വാര്‍ഷികത്തോടനുബന്ധിച്ച് 3 വീടുകളാണ് നിര്‍മ്മിച്ച് നല്‍കുന്നത്.
ഭവനദാന പദ്ധതിയുടെ വാര്‍ഷികത്തോടനുബന്ധിച്ച് എല്ലാവര്‍ക്കും വീട് പദ്ധതി ആരംഭിക്കുവാനാണ് ബിജെപി പഞ്ചായത്ത് കമ്മറ്റിയുടെ തീരുമാനം. ഇതിന്റെ ഭാഗമായി ചിറക്കടവ് പഞ്ചായത്തിനുള്ളിലെ വീടും സ്ഥലവും ഇല്ലാത്തവരില്‍ നിന്നും അപേക്ഷകള്‍ സ്വീകരിച്ചിട്ടുണ്ട്. നൂറുകണക്കിന് അപേക്ഷകളാണ് ലഭിച്ചിട്ടുള്ളത്. സ്ഥലവും വീടും ഇല്ലാത്ത ഒരു കുടുംബത്തിന് അപേക്ഷകളില്‍ നിന്നും നറുക്കെടുപ്പിലൂടെ 27ന് നടക്കുന്ന സമ്മേളനത്തില്‍ ഭവനദാനം നടത്തും.
പൊന്‍കുന്നം രാജേന്ദ്രമൈതാനത്ത് ഉച്ചകഴിഞ്ഞ് 3ന് നടക്കുന്ന സമ്മേളത്തില്‍ ബിജെപി പഞ്ചായത്ത് കമ്മറ്റി പ്രസിഡന്റ് വിജു മണക്കാട്ട് അദ്ധ്യക്ഷത വഹിക്കും. ബിജെപി സംസ്ഥാന ജനറല്‍ സെക്രട്ടറി കെ. സുരേന്ദ്രന്‍ സമ്മേളനം ഉദ്ഘാടനം ചെയ്യും. മൂന്നു വീടുകളുടെ താക്കോല്‍ദാനം ഭരത് സുരേഷ് ഗോപി നിര്‍വ്വഹിക്കും. മുന്‍ കേന്ദ്രമന്ത്രി പി.സി. തോമസ്, ജില്ലാ പ്രസിഡന്റ് ഏറ്റുമാനൂര്‍ രാധാകൃഷ്ണന്‍, ജില്ലാ ജനറല്‍ സെക്രട്ടറിമാരായ കെ.എം. സന്തോഷ്‌കുമാര്‍, എന്‍.ഹരി, നിയോജകമണ്ഡലം പ്രസിഡന്റ് കെ.ജി.കണ്ണന്‍, വി.എന്‍. മനോജ്, ടി.ബി. ബിനു എന്നിവര്‍ പ്രസംഗിക്കും.
