കാലടി: ശരീരം പൂര്ണ്ണമായി തളര്ന്ന മകളുടെ ചികിത്സക്കായി മാതാപിതാക്കള് ചികിത്സ സഹായം തേടുന്നു. കാടപ്പാറ കുടുക്കിലാന് കവലയില് വട്ടക്കുന്നില് വീട്ടില് ബാലകൃഷ്ണന്. മണി ദമ്പതികളുടെ മകള് നിമിഷ ദേവി (26)യുടെ ചികിത്സക്കായാണ് സുമനസ്സുകളുടെ സഹായം തേടുന്നത്. ഭോപ്പാലില് നാഷണല് ആശുപത്രിയില് നഴ്സ് ആയിരുന്ന നിമിഷ ദേവിയെ പനി ബാധിച്ചപ്പോള് മരുന്ന് മാറി കുത്തിവച്ചതിനെ തുടര്ന്ന് ശരീരം മുഴുവനും തളര്ന്ന് കിടപ്പിലാവുകയായിരുന്നു. രണ്ടായിരത്തി പതിമൂന്നിലാണ് ശരീരം തളര്ന്നത്.
ആശുപത്രി അധികൃതരുടെ മേല് നോട്ടത്തില് ഒമ്പത് മാസത്തോളം ഭോപ്പാലില് ചികിത്സ നടത്തിയെങ്കിലും കൈകാലുകളുടെ ചലന ശേഷിയും സംസാര ശേഷിയും വീണ്ടെടുക്കാനായില്ല. ഇപ്പോള് അമൃത ആശുപത്രിയില് ചികിത്സയിലാണ്. കൂലിപ്പണിക്കാരായ മാതാപിതാക്കള് മാറിമാറിയാണ് മകളെ പരിചരിക്കുന്നത്. നാല് സെന്റ് സ്ഥലവും അതില് ആസ്ബ സ്റ്റോസ് മേഞ്ഞ ചെറിയ വീട്ടിലാണ് നിമിഷയെ കിടത്തിയിരിക്കുന്നത്. ഈ വീട്ടിലേയ്ക്ക് പോകുന്നതിന് ഇടുങ്ങിയ വഴിയാണ് ഉള്ളത്.
ആഹാരം ദ്രാവക രൂപത്തിലാക്കി ട്യൂബ് വഴിയാണ് നല്കുന്നത്. ഈ കുടുംബത്തിന്റെ ദുരവസ്ഥ നേരില് കണ്ട കാലടി ജന മൈത്രി പോലീസ് ബീറ്റ് ഓഫീസര് പി.പി.ബിനുമുന്കൈയെടുത്താണ് ചികിത്സ സഹായ സമിതി രൂപീകരിച്ചത്. മലയാറ്റൂര് എസ്ബിടി ശാഖയില് അക്കൗണ്ട് തുറന്നിട്ടുണ്ട്. അക്കൗണ്ട് നമ്പര് 67242421696 ഐഎഫ്സി കോഡ് എസ്ബിടിആര് 0000959. ഫോണ്: 8281324832.
