കൊച്ചി: ഹെല്മെറ്റ് നിര്ബന്ധമാക്കികൊണ്ടുള്ള ഹൈക്കോടതി ഉത്തരവിനെതിരെ ഇരുചക്രവാഹന യാത്രക്കാരുടെയും പൊതുജനങ്ങളുടെയും അഭിപ്രായം തേടുന്നതിനായി സംസ്ഥാന വ്യാപകമായി അഭിപ്രായ സര്വെ നടത്തും. 24ന് രാവിലെ ഒന്പത് മുതല് 12 വരെ ജില്ലാ ആസ്ഥാനങ്ങളിലാണ് സര്വേ സംഘടിപ്പിച്ചിരിക്കുന്നത്. സര്വെയുടെ സംസ്ഥാനതല ഉദ്ഘാടനം തിരുവനന്തപുരം സെക്രട്ടറിയേറ്റിനു മുമ്പില് നടത്തും. എറണാകുളം ജില്ലാ തല ഉദ്ഘാടനം രാവിലെ 10ന് മേനക ജംങ്ഷനില് പ്രൊഫ. കെ. അരവിന്ദാക്ഷന് നിര്വഹിക്കും. സര്വേയുടെ ഫലം എത്രയും വേഗം പ്രസിദ്ധീകരിക്കുമെന്നും അവര് പറഞ്ഞു. പിന്സീറ്റ് യാത്രികര്ക്ക് ഹെല്മറ്റ് നിര്ബന്ധമാക്കികൊണ്ടുള്ള ഉത്തരവ് ഇരുചക്രവാഹന യാത്രികര്ക്ക് ഏറെ ബുദ്ധിമുട്ട് ഉണ്ടാക്കുന്നതാണ്. ഇടക്കാല ഉത്തരവ് നടപ്പിലാക്കുന്നത് പുനപരിശോധിക്കണമെന്നും സംസ്ഥാന സര്ക്കാര് കൊണ്ടു വന്ന മോട്ടോര് വാഹന ചട്ടഭേദഗതി ഇടക്കാല ഉത്തരവിലൂടെ സ്റ്റേ ചെയ്തതിനെതിരെ സര്ക്കാര് തലത്തില് അപ്പീല് നല്കണമെന്നും ബൈവീലേഴ്സ് അസോസിയേഷന് ആവശ്യപ്പെട്ടു.
ബ്യൂറോ ഓഫ് ഇന്ത്യന് സ്റ്റാന്ഡേര്ഡ് അനുസരിച്ചുള്ള ഹെല്മറ്റുകള് ഇന്നു വിപണിയിലില്ല. നിലവില് കമ്പോളത്തില് ലഭിക്കുന്ന വ്യാജ ഐഎസ്ഐ മാര്ക്കുള്ള ഹെല്മറ്റുകള് കര്ശന പരിശോധനകള്ക്ക് വിധേയമാക്കണമെന്നും അവര് ആവശ്യപ്പെട്ടു. ബൈ വീലേഴ്സ് അസോസിയേഷന് പ്രസിഡന്റ് കുരുവിള മാത്യൂസ്, ജനറല് സെക്രട്ടറി രാജന് മാത്യൂസ്, വി.കെ. ശശികുമാര്, ആന്റ്റോജി, സി. ശിവാനന്ദന് എന്നിവര് വാര്ത്താസമ്മേളനത്തില് പങ്കെടുത്തു.
