കെയ്‌റോ:പുതിയ സര്‍ക്കാര്‍ അധികാരത്തിലെത്തിയതോടെ ഭാരതത്തിനുപുറത്തുള്ള ഭാരതവംശജര്‍ക്ക് ജന്മദേശത്ത് നിക്ഷേപം നടത്താന്‍ മികച്ച അവസരമാണുള്ളതെന്ന് വിദേശകാര്യ മന്ത്രി സുഷമ സ്വരാജ്. ഈജിപ്ത് സന്ദര്‍ശനവേളയില്‍ കെയ്‌റോയിലെ ഭാരത സമൂഹം നല്‍കിയ വിരുന്നില്‍ സംസാരിക്കുകയായിരുന്നു മന്ത്രി സുഷമ.
ഭാരതത്തിന്റെ സാമ്പത്തിക രംഗം വളര്‍ത്തിയെടുക്കാന്‍ പശ്ചിമേഷ്യയും വടക്കന്‍ ആഫ്രിക്കയും പ്രമുഖ പങ്കാണ് വഹിക്കുന്നത്. ഈജിപ്തുമായുള്ള സഹകരണവും വ്യാപാര വാണിജ്യ പങ്കാളിത്തങ്ങളും മെച്ചപ്പെടുത്തിയെടുക്കാന്‍ ഭാരതം അതീവശ്രദ്ധ നല്‍കുന്നുണ്ട്.ഗള്‍ഫ്,പശ്ചമേഷ്യ, വടക്കന്‍ ആഫ്രിക്ക എന്നിവിടങ്ങളിലെ രാജ്യങ്ങള്‍ തമ്മില്‍ രാജ്യത്തിന് വളരെ മികച്ച വ്യാപാര വാണിജ്യ ബന്ധമാണുള്ളത്. വ്യാപാര മേഖല കൂടാതെ ദേശീയ സുരക്ഷ ഉറപ്പുവരുത്തുന്നതിനും രാജ്യങ്ങള്‍ തമ്മിലുള്ള സഹകരണം ആവശ്യമാണ്. ഈജിപ്തും ഭാരതവും തമ്മില്‍ നിലനില്‍ക്കുന്ന സഹകരണവും പങ്കാളിത്തങ്ങളും ഇനിയും ശക്തിമായിത്തുടരുമെന്നും സുഷമ സ്വരാജ് പറഞ്ഞു.
ഭാരതത്തെ ആഗോളതലത്തിലുള്ള വാണിജ്യ നിര്‍മ്മാണ കേന്ദമാക്കി മാറ്റിയെടുക്കാനാണ് നിലവിലെ സര്‍ക്കാര്‍ ശ്രമിച്ചു വരുന്നത്.
പ്രധാനമന്ത്രി നരേന്ദ്രമോദിയുടെ നേതൃത്വത്തിലുള്ള എന്‍ഡിഎ സര്‍ക്കാര്‍ അധികാരത്തിലെത്തിയതോടെ രാജ്യത്തിന്റെ സാമ്പത്തിക വ്യവസ്ഥിതിയില്‍ വന്‍മാറ്റങ്ങള്‍ക്കുവഴിവെച്ചിട്ടുണ്ട്. ഭാരതത്തിന്റെ ഈ വളര്‍ച്ചയില്‍ വിദേശ ഭാരതീയര്‍കുടി പങ്കാളികളാകേണ്ടതാണ്. ഇവര്‍ക്കായി വന്‍ വാണിജ്യ- നിര്‍മ്മാണ സാധ്യതകളാണ് ഭാരതത്തിലുള്ളത്. നിര്‍മ്മാണമേഖലയെ ശക്തിപ്പെടുത്തുന്നതിനായി കേന്ദ്ര സര്‍ക്കാര്‍ രൂപം നല്‍കിയ പദ്ധതിയാണ് മെയ്‌ക് ഇന്‍ ഇന്ത്യ. കൂടാതെ രാജ്യത്തിനു പുറത്തുള്ള ഭാരതീയരുടെ ക്ഷേമം ഉറപ്പുവരുത്തുന്നതിനും ഭാരതം പ്രാധാന്യം നല്‍കുന്നുണ്ട്.നിലവിലെ സര്‍ക്കാര്‍ അധികാരത്തിലെത്തി 15 മാസത്തിനുള്ളില്‍തന്നെ രാജ്യഭരണത്തില്‍ സുതാര്യത കൈവരിക്കാന്‍ സാധിച്ചിട്ടുണ്ടെന്നും സുഷമ പറഞ്ഞു.
തടവില്‍ കഴിഞ്ഞിരുന്ന രണ്ട് ഭാരത വംശജരെ വിട്ടയയ്‌ക്കാനുള്ള ഈജിപ്ത് സര്‍ക്കാരിന്റെ തീരുമാനത്തില്‍ സന്തോഷമുണ്ടെന്നും സുഷമ അറിയിച്ചു. 22 ഉം 16ഉം വര്‍ഷത്തോളം ഈജിപ്തില്‍ തടവില്‍ കഴിയുകയായിരുന്ന ഇവര്‍ ഭാരതത്തിലേക്കു മടങ്ങാനുള്ള തയ്യാറെടുപ്പിലാണ്. ഭാരത്തിന്റെ സുരക്ഷാ മേഖലയിലും ഗള്‍ഫ്, വടക്കന്‍ ആഫ്രിക്കന്‍ രാജ്യങ്ങള്‍ വഹിച്ചിട്ടുള്ള പങ്ക് വളരെ വലുതാണെന്നും വിദേശ കാര്യമന്ത്രി കൂട്ടിച്ചേര്‍ത്തു. രണ്ടുദിവസത്തെ ഈജിപ്ത് സന്ദര്‍ശനത്തിനായി ഞായറാഴ്ചയാണ് സുഷമ കെയ്‌റോയിലെത്തിയത്. സന്ദര്‍ശനം പൂര്‍ത്തിയാക്കി ഇന്ന് ജര്‍മ്മനിയിലേക്ക് തിരിക്കും.
