ആലപ്പുഴ: എഴുത്തുകാരുടെ സാന്നിധ്യത്തില്‍ പുസ്തകങ്ങളുടെ വിശകലനം നടത്താന്‍ വായനക്കാര്‍ക്ക് അവസരമൊരുക്കി ചെട്ടികാട് ഔവ്വര്‍ ലൈബ്രറി. ഗ്രന്ഥശാലയുടെ 50-ാമത് വാര്‍ഷികാഘോഷ ഥാഗമായാണ് വായനയുടെ വസന്തോത്സവം എന്ന പേരില്‍ ഇത്തരത്തിലൊരു പ്രതിമാസ പരിപാടി സംഘടിപ്പിച്ചിരിക്കുന്നതെന്ന് സ്വാഗതസംഘം രക്ഷാധികാരി ജയന്‍ തോമസ് പത്രസമ്മേളനത്തില്‍ അറിയിച്ചു.
24ന് കെ.ആര്‍. മീരയുടെ ആരാച്ചാര്‍ എന്ന പുസ്തകം നിരൂപണം നടത്തും. രചയിതാവിന്റെ സാന്നിധ്യത്തില്‍ സംഘടിപ്പിക്കുന്ന പരിപാടിയില്‍ കേരള ഭാഷാ ഇന്‍സ്റ്റിറ്റ്യൂട്ട് റിസര്‍ച്ച് ഓഫീസര്‍ സി. അശോകന്‍ ആമുഖ നിരൂപണം നടത്തും.എല്ലാ മാസങ്ങളിലും എഴുത്തുകാരുടെയും പ്രമുഖ നിരൂപകരുടെയും വായനക്കാരുടെയും പുസ്തകചര്‍ച്ച നടത്തും. ഔവര്‍ ലൈബ്രറി ഈ വര്‍ഷത്തെ കഥാ സാഹിത്യ പുരസ്‌ക്കാരം എറണാകുളം സ്വദേശി സാബു പുളിക്കത്തറയും, കവിതാ പുരസ്‌ക്കാരം താഹാ ജമാല്‍ പായിപ്പാടും അര്‍ഹരായി.
ഗ്രന്ഥശാലയുടെ 48-ാമത് വാര്‍ഷികാഘോഷങ്ങളുടെ ഉദ്ഘാടന വേദിയില്‍ ചുനക്കര ജനാര്‍ദ്ദനന്‍ നായര്‍ പുരസ്‌ക്കാരങ്ങള്‍ സമ്മാനിക്കും. 23 ന് ആഘോഷപരിപാടി സംസ്ഥാന ലൈബ്രറി കൗണ്‍സില്‍ പ്രസിഡന്റ് ഡോ. കെ.വി. കുഞ്ഞികൃഷ്ണന്‍ ഉദ്ഘാടനം ചെയ്യും. പത്രസമ്മേളനത്തില്‍ സ്വാഗതസംഘം ജനറല്‍ കണ്‍വീനര്‍ വി.കെ. സാനു, ആര്‍. ചന്ദ്രലാല്‍ എന്നിവരും പങ്കെടുത്തു.
