പള്ളുരുത്തി: കുമ്പളങ്ങി സര്ക്കാര് ആശുപത്രി സമരം ചിങ്ങം ഒന്നിന് നൂറു ദിനം പിന്നിട്ടു. ആശുപത്രിയിലെ സ്റ്റാഫ് പാറ്റേണ് അനുവദിക്കണമെന്നാവശ്യപ്പെട്ട് നടക്കുന്ന ജനകീയ സമരത്തിന്റെ നൂറാംദിനത്തില് നൂറു സമര ഭടന്മാര് നിരാഹാരം അനുഷ്ഠിച്ചു.
അധികാരികളുടെ ജനങ്ങളോടുള്ള വെല്ലുവിളിയാണ് ഇപ്പോള് നടക്കുന്നതെന്ന് സമരസമിതി ഭാരവാഹികള് കുറ്റപ്പെടുത്തി. നിരാഹാര സമരത്തിന് അഭിവാദ്യം അര്പ്പിച്ച് ഇല്ലിക്കല് ജംങ്ഷനില് നിന്ന് സമരപന്തലിലേക്ക് പ്രകടനം നടത്തി. സമരം വരും ദിനങ്ങളില് കൂടുതല് ശക്തിപ്പെടുത്തുമെന്ന് സമരക്കാര് പറഞ്ഞു.
കുമ്പളങ്ങി ഗ്രാമ പഞ്ചായത്തിലെ കര്ഷക ദിനാചരണത്തില് പങ്കെടുക്കാന് എത്തിയ എം എല് എ ഡൊമിനിക് പ്രസന്റേഷനെ സമരാനുകൂലികള് പ്രധാന റോഡില് തടഞ്ഞു. എംഎല്എ യുടേയും, എംപിയുടേയും കോലം ഒരു വിഭാഗം ആളുകള് ചേര്ന്ന് കത്തിച്ചു. നൂറാം സമര ദിന പരിപാടികള് അഡ്വ.എന് എന് .സുഗുണപാലന് ഉദ്ഘാടനം ചെയ്തു.പി.എ. ഷണ്മാതുരന്, അഡ്വ.ജോസഫ് ഇടക്കാട്ട്, വി ഡി മജീന്ദ്രന്, ലാല് കോയിപ്പറമ്പില് ,ടി.എ. ഡാല് ഫിന്, എം.ആര്. രാജേന്ദ്രന് നായര് എന്നിവര് പ്രസംഗിച്ചു.
