ചേര്ത്തല: അന്തര്ദേശീയ മഹാഗണപതി സത്രത്തിന്റെ ഭാഗമായി ഗണപതി പ്രീതിനേടുവാന് നാടൊരുങ്ങി. ഇന്ന് വൈകിട്ട് മുഖ്യമന്ത്രി തിരിതെളിക്കുന്നതോടെ ഒമ്പതുദിനം നീളുന്ന സത്രത്തിനു തുടക്കമാകും. എല്ലാദിവസവും പുലര്ച്ചെ നടക്കുന്ന അഷ്ടദ്രവ്യ ഗണപതിഹോമത്തിന് സൂര്യകാലടി സൂര്യന് ജയസൂര്യ നമ്പൂതരിപ്പാട്, പുതുമന ദാമോദരന് നമ്പൂതിരി, പറവൂര് രാകേഷ്തതന്ത്രി, കോരുത്തോട് ബാലകൃഷ്ണന് തന്ത്രി, ഡോ.പി.സി. ചേന്നാസ് ദിനേശന് നമ്പൂതിരിപ്പാട്, മള്ളിയൂര് പരമേശ്വരന് നമ്പൂതിരിപ്പാട് എന്നിവര് മുഖ്യകാര്മ്മികത്വം വഹിക്കും. സത്രത്തില് വിഘ്നേശ്വരന്റെ ഒമ്പതു ഭാവങ്ങളിലും പ്രത്യേകപൂജകള് നടത്തും. ഓരോദിനത്തിലും ബാലഗണപതി, വീര ഗണപതി, ശക്തി ഗണപതി, ലക്ഷ്മീ ഗണപതി, വിഘ്ന ഗണപതി, ഹരിദ്രഗണപതി, ഋണമോചന ഗണപതി, ജഗന്മോഹന ഗണപതി, മഹാ ഗണപതി എന്നീ ഭാവങ്ങളിലായാണ് പൂജകള്.
സത്രമണ്ഡപത്തില് പ്രതിഷ്ഠിക്കുന്നതിനുള്ള ഗണേശ വിഗ്രഹം പള്ളൂരുത്തി ഭവേനീശ്വരക്ഷേത്രത്തില് നിന്നും സത്രനിര്വ്വഹണ സമിതി ചെയര്മാന് കെ.ആര്. രാജേന്ദ്രപ്രസാദ് ഏറ്റുവാങ്ങി. തുടര്ന്ന് 120 ലധികം ക്ഷേത്രങ്ങളില് സ്വീകരണങ്ങള് ഏറ്റുവാങ്ങി വിഗ്രഹ ഘോഷയാത്ര രാത്രി തങ്കികവല ആറാട്ടുകുളം ശക്തിവിനായക ക്ഷേത്രത്തിലെത്തിച്ചേരും. നിരവധി വാഹനങ്ങളുടെ അകമ്പടിയോടെയാണ് വിഗ്രഹം എഴുന്നള്ളിച്ചത്. വെള്ളിയാഴ്ച രാവിലെ മുതല് ചേര്ത്തല മേഖലയില് പര്യടനത്തിന് ശേഷമാണ് വിഗ്രഹം സത്രമണ്ഡപത്തിലേക്കെഴുന്നള്ളിക്കുന്നത്. കോരുത്തോട് ബാലകൃഷ്ണന് തന്ത്രി മൂലവിഗ്രഹം പ്രതിഷ്ഠിച്ച് ഭദ്രദീപം പ്രകാശിപ്പിക്കും. കണ്ടമംഗലം ക്ഷേത്രത്തിനു പുറമെ തങ്കികവല ആറാട്ടുകുളം ശക്തിവിനായക ക്ഷേത്രത്തിലുമായാണ് 23വരെ സത്രം നടക്കുന്നത്. 14ന് മൂന്നിന് മുഖ്യമന്ത്രി ഉമ്മന്ചാണ്ടി സത്രത്തിനു തിരിതെളിക്കും. പി.തിലോത്തമന് എംഎല്എ അദ്ധ്യക്ഷത വഹിക്കും. വിദ്വല്ജ്ഞാന സദസ്സുകള് എസ്എന്ഡിപി യോഗം ജനറല്സെക്രട്ടറി വെള്ളാപ്പള്ളി നടേശന് ഉദ്ഘാടനം ചെയ്യും. വിദ്യാഭ്യാസ അവാര്ഡുകള് മന്ത്രി കെ.ബാബു വിതരണം ചെയ്യും. മുഖ്യാതിഥിയായി ക്രിക്കറ്റ് താരം ശ്രീശാന്ത് പങ്കെടുക്കും. ശാന്തിഗിരി ആശ്രമം ഓര്ഗനൈസിംഗ് സെക്രട്ടറി ഗുരുരത്നം ജ്ഞാന തപസ്വി അനുഗ്രഹ പ്രഭാഷണവും നടത്തും.
