ആലപ്പുഴ: രാജ്യത്തിന്റെ അറുപത്തിയൊമ്പതാമത് സ്വാതന്ത്ര്യദിനം വിപുലമായി ആഘോഷിക്കാന് ജില്ലയൊരുങ്ങി. ജില്ലാതലത്തിലും ബ്ലോക്ക്-ഗ്രാമപഞ്ചായത്ത് തലത്തിലും ആഘോഷങ്ങള് നടക്കും.
15ന് രാവിലെ 8.30ന് ആലപ്പുഴ പോലീസ് പരേഡ് മൈതാനത്ത് നടക്കുന്ന സ്വാതന്ത്ര്യദിനാഘോഷചടങ്ങില് ആരോഗ്യ-ദേവസ്വം മന്ത്രി വി.എസ്. ശിവകുമാര് ദേശീതപതാക ഉയര്ത്തും. വിവിധ ട്രൂപ്പുകളുടെ സ്വാതന്ത്ര്യദിനപരേഡ് പരിശോധിക്കുന്ന മന്ത്രി പരേഡില് അഭിവാദ്യം സ്വീകരിക്കും. തുടര്ന്ന് അദ്ദേഹം സ്വാതന്ത്ര്യദിനസന്ദേശം നല്കും.
പോലീസിന്റെയും എക്സൈസിന്റെയും എന്സിസി, സ്റ്റുഡന്റ് പൊലീസ് കേഡറ്റ്സ്, സ്കൗട്ട്, ഗൈഡ്സ്, റെഡ് ക്രോസ്, കബ്സ്, ബുള്ബുള് എന്നിവയുടെയുമായി 34 പ്ലാറ്റൂണുകളും ആറു ബാന്ഡ് ട്രൂപ്പുകളും പരേഡില് പങ്കെടുക്കും. പരേഡ് കമാന്ഡര് എം.ജെ. ജോയിയുടെ നേതൃത്വത്തിലാണ് പരേഡ് നടക്കുക.
മുഖ്യമന്ത്രിയുടെ പോലീസ് മെഡലിന് അര്ഹരായ നര്ക്കോട്ടിക് സെല് എസ്ഐ എസ്. അബ്ദുള് നാസര്, അമ്പലപ്പുഴ പോലീസ് സ്റ്റേഷനിലെ എസ്ഐ ജെ. രാധാകൃഷ്ണന് എന്നിവര്ക്ക് ചടങ്ങില് മെഡല് സമ്മാനിക്കും. മികച്ച ട്രൂപ്പുകള്ക്കുള്ള ട്രോഫികളും വിതരണം ചെയ്യും.
പൊതുവിദ്യാഭ്യസ വകുപ്പും നെഹ്റു യുവകേന്ദ്രയും സംഘടിപ്പിച്ച ദേശഭക്തി ഗാനാലാപന മത്സരത്തില് ഒന്നാംസ്ഥാനം നേടിയ ആലപ്പുഴ സെന്റ് ആന്റണീസ് ഗേള്സ് എച്ച്.എസിനും ദേശീയഗാനാലാപന മത്സരത്തില് ഒന്നാംസ്ഥാനം നേടിയ പുന്നപ്ര ജ്യോതി നികേതന് സീനിയര് സെക്കന്ഡറി സ്കൂളിനുമുള്ള സമ്മാനങ്ങള് ചടങ്ങില് വിതരണം ചെയ്യും. സായുധസേനാ പതാകദിനനിധിയിലേക്ക് ഏറ്റവും കൂടുതല് തുക സംഭാവന ചെയ്ത വിദ്യാഭ്യാസസ്ഥാപനമായ ആലപ്പുഴ സെന്റ് ജോസഫ്സ് സ്കൂളിനും സര്ക്കാര് സ്ഥാപനമായ സഹകരണ സംഘം ജോയിന്റ് രജിസ്ട്രാര് ഓഫീസിനുമുള്ള ട്രോഫികളും സമ്മാനിക്കും.
ബ്ലോക്ക്-ഗ്രാമപഞ്ചായത്ത് തലത്തിലും സ്വാതന്ത്ര്യദിനാഘോഷം നടക്കും. സ്കൂളുകള് കോളജുകള്, സര്ക്കാര് ഓഫീസുകള് എന്നിവിടങ്ങളിലും സ്വാതന്ത്ര്യദിനാഘോഷം നടക്കും.
