കോട്ടയം: പുതുതായി നിര്‍മ്മിച്ച കോട്ടയം പ്രസ്‌ക്ലബ് മന്ദിരത്തിന്റെ ഉദ്ഘാടനം നാളെ രാവിലെ 10.30ന് മുഖ്യമന്ത്രി ഉമ്മന്‍ ചാണ്ടി നിര്‍വഹിക്കും. മീഡിയാ ഹാള്‍ മന്ത്രി കെ.എം.മാണി സമര്‍പ്പിക്കും .പൊതു സമ്മേളനം മന്ത്രി തിരുവഞ്ചൂര്‍ രാധാകൃഷ്ണന്‍ ഉദ്ഘാടനം ചെയ്യും. മന്ത്രി കെ.സി.ജോസഫ് മുഖ്യാതിഥി ആയിരിക്കും.എല്‍.ഡി.എഫ്.കണ്‍വീനര്‍ വൈക്കം വിശ്വന്‍ മുഖ്യപ്രഭാഷണം നടത്തും.
കേരള പ്രസ് അക്കാദമി മുന്‍ ചെയര്‍മാന്‍ തോമസ് ജേക്കബ്, മന്ത്രി വി.കെ.ഇബ്രാഹിം കുഞ്ഞ്, ജോസ് കെ.മാണി എം.പി., സുരേഷ് കുറുപ്പ് എം.എല്‍.എ., മുന്‍ എം.എല്‍.എ. വി.എന്‍.വാസവന്‍, നഗരസഭാ ചെയര്‍മാന്‍ കെ.ആര്‍.ജി.വാര്യര്‍, ബി.ജെ.പി.ജില്ലാ പ്രസിഡന്റ് ഏറ്റുമാനൂര്‍ രാധകൃഷ്ണന്‍, ഓയില്‍പാം ഇന്ത്യ മുന്‍ ചെയര്‍മാന്‍ വി.ബി.ബിനു, മീഡിയാ അക്കാദമി ചെയര്‍മാന്‍ സെര്‍ജി ആന്റണി, കേരള പത്രപ്രവര്‍ത്തക യൂണിയന്‍ സംസ്ഥാന പ്രസിഡന്റ് കെ.പ്രേംനാഥ്, ജനറല്‍ സെക്രട്ടറി എന്‍.പത്മനാഭന്‍, ട്രഷറര്‍ ബി.ജ്യോതികുമാര്‍ എന്നിവര്‍ ആശംസകള്‍ നേരും. പ്രസ്‌ക്ലബ് പ്രസിഡന്റ് എസ്.മനോജ് അധ്യക്ഷത വഹിക്കും. സെക്രട്ടറി ഷാലു മാത്യു സ്വാഗതവും ട്രഷറര്‍ ശ്രീകുമാര്‍ ആലപ്ര നന്ദിയും പറയും.
കോട്ടയം കെ.എസ്.ആര്‍.ടി.സി. ബസ് സ്റ്റാന്റിന് അഭിമുഖമായി 2012 ഫെബ്രുവരിയില്‍ സംസ്ഥാന സര്‍ക്കാര്‍ പതിച്ചു നല്‍കിയ പത്ത് സെന്റ് സ്ഥലത്ത് കേരള പത്രപ്രവര്‍ത്തക യൂണിയന്‍ ജില്ലാ ഘടകം, റെക്കോര്‍ഡ് സമയത്തിനുളളിലാണ് പുതിയ മന്ദിരത്തിന്റെ നിര്‍മ്മാണം പൂര്‍ത്തീകരിച്ചത്. അത്യാധുനിക സൗകര്യങ്ങളോടെ സെല്ലാര്‍ ഉള്‍പ്പടെ ആദ്യഘട്ടത്തില്‍ മൂന്നു നിലകളുടെ നിര്‍മ്മാണമാണ് പൂര്‍ത്തിയായത്.മന്ദിരത്തിന്റെ ഒന്നാം നിലയിലാണ് മീഡിയാ ഹാള്‍ ഒരുക്കിയിരിക്കുന്നത്.120 മാധ്യമപ്രവര്‍ത്തകര്‍ക്ക് ഒരേ സമയം സുഗമമായി വാര്‍ത്ത റിപ്പോര്‍ട്ട് ചെയ്യാന്‍ കഴിയുന്ന ക്രമീകരണമാണ് ഹാളിലുളളത്.
