585. മഹാജ്ഞാനസ്വരൂപാംബാ – മഹത്തായ ജ്ഞാനം സ്വരൂപമായുള്ള അമ്മ. ഇതു മുതല് 600 വരെയുള്ള നാമങ്ങള് മൂകാംബികാദേവിയെ മാനസീദേവിയായി സ്തുതിക്കുന്നു. അടുത്ത നാമത്തില് പരാമര്ശിക്കുന്ന മാനസീദേവിയുടെ വിശേഷണമാണ് ഈ നാമം. എല്ലാ ജ്ഞാനവും ഏകീഭവിച്ച രൂപമുള്ളവളായി ദേവിയെ അവതരിപ്പിക്കുന്നു.
586. മാനസീ – മാനസീദേവി. കശ്യപപ്രജാപതിയുടെ മനസ്സില് നിന്നുണ്ടായ മകളാകയാലും മനസ്സിന്റെ അധിഷ്ഠാനദേവതയാകയാലും ‘മാനസീ’ എന്നും ‘മനസാ’ എന്നും ദേവിക്കു ഗുണനാമങ്ങള്. മാനസീദേവി ചെറുപ്പത്തില് ആയിരംകൊല്ലം ശിവനെ ഉദേശിച്ചു തപസ്സുചെയ്ത് ശിവനില് നിന്നു സര്വജ്ഞത്വവും സാമവേദവും നേടിയതുകൊണ്ടാണ് സര്വജ്ഞാനസ്വരൂപിയായി മുമ്പു കീര്ത്തിച്ചത്. ശിവന് ദേവിയെ ശിഷ്യയായി സ്വീകരിച്ചു ശ്രീകൃഷ്ണനെ പ്രീതിപ്പെടുത്താനുള്ള മന്ത്രവും പൂജാക്രമവും ഭഗവാന് ശിഷ്യയ്ക്കുപദേശിച്ചു. മാനസീദേവി ശ്രീകൃഷ്ണപരമാത്മാവിനെ ഉദേശീച്ചു മൂന്നുയുഗം നീണ്ട തപസ്സനുഷ്ഠിച്ചു. പ്രീതനായ ഭഗവാന് മനസാദേവിക്ക് പരിമിതികളില്ലാത്ത അനുഗ്രഹശക്തി ദാനം ചെയ്തു.
മാനസീദേവി ക്ഷിപ്രപ്രസാദിനിയാണ്. ഭക്തര് ആഗ്രഹിക്കുന്നതെല്ലാം കൊടുത്തനുഗ്രഹിക്കുന്ന കാരുണ്യമൂര്ത്തിയാണ്.
587. കശ്യപാത്മജാ – കശ്യപപ്രജാപതിയുടെ മകള്. ദേവികശ്യപ പ്രജാപതിയുടെ മാനസപുത്രിയാണെന്നു മുന്നാമത്തിന്റെ വ്യാഖ്യാനത്തില് പറഞ്ഞു. ദേവി കശ്യപന്റെ ആത്മാവില്നിന്നുണ്ടായവളാകയാല് അക്ഷരാര്ത്ഥത്തില് ആത്മജയാണ്.
… തുടരും
