ആലുവ: ആലുവ ശിവരാത്രി മണപ്പുറത്ത് കഞ്ചാവ്-വ്യാജ മദ്യമാഫിയ അഴിഞ്ഞാടുന്നു. വ്യാജമദ്യം കഴിച്ച് ഇന്നലെ രാവിലെ ശിവക്ഷേത്രത്തിനുമുന്നിലെത്തി ബഹളമുണ്ടാക്കിയ സ്ത്രീയെ വനിതാ പോലീസ് എത്തി അറസ്റ്റ് ചെയ്ത് നീക്കി. ഇന്നലെ രാവിലെ 6 മണിക്കാണ് സംഭവം. മണപ്പുറത്തെ കുട്ടിവന പരിസരത്ത് സന്ധ്യമയങ്ങിയാല് മദ്യവും കഞ്ചാവും സുലഭമാണ്.
നഗരത്തില് കുപ്പിയും മറ്റും പെറുക്കി ഉപജീവനം നടത്തുന്ന തമിഴ്നാട്ടുകാരിയായ 54 കാരിയാണ് മദ്യപിച്ച് ക്ഷേത്രത്തിനുമുന്നിലെത്തി ബഹളമുണ്ടാക്കിയത്. രാവിലെ ക്ഷേത്രദര്ശനത്തിനെത്തിയ സ്ത്രീകള്ക്ക് ക്ഷേത്രത്തിനുളളിലേക്ക് കടക്കുവാന് കഴിയാത്ത വിധത്തില് ഇവര് വസ്ത്രമുരിഞ്ഞ് ക്ഷേത്ര കവാടത്തില് കിടക്കുകയും ചെയ്തു. ദേവസ്വം അധികൃതര് ആലുവ പോലീസില് വിവരം ധരിപ്പിച്ചതിനെ തുടര്ന്ന് ഒരു മണിക്കൂറിനു ശേഷമാണ് ഇവരെ പോലീസ് നീക്കിയത്. ഇതിനിടെ നാട്ടുകാര് രംഗത്തുവന്നതോടെ ഈ സ്ത്രീ പുഴയിലേക്ക് കുളിക്കാനിറങ്ങിയതും ആശങ്കയുണ്ടാക്കി.
ശിവക്ഷേത്ര പരിസരത്ത് ഇപ്പോള് അന്യസംസ്ഥാനങ്ങളില് നിന്നുളള നിരവധി പേര് രാത്രി തങ്ങുന്നുണ്ട്. ദേവസ്വം ആരംഭിച്ച സൗജന്യ അന്നദാനവും ഇവര്ക്ക് ലഭിക്കുന്നു. പോലീസില് പരാതി നല്കിയാലും നിരന്തരമായ പരിശോധനകള് കഞ്ചാവ്-മദ്യമാഫിയകള്ക്കെതിരെ നടത്തുന്നില്ലെന്നതാണ് നാട്ടുകാരുടെ പരാതി.
അടുത്തിടെ ഓട്ടോറിക്ഷയിലെത്തി കഞ്ചാവ് വില്പ്പന നടത്തിയ ഒരാളെ നാട്ടുകാര് പിടികൂടി കൈതല്ലി ഒടിച്ച സംഭവം വരെ ഇവിടെയുണ്ടായതാണ്. നാട്ടുകാരായ ചില വിദ്യാര്ഥികള്ക്ക് സൗജന്യമായി കഞ്ചാവ് നല്കി സൗഹൃദമുണ്ടാക്കിയ ശേഷം പിന്നീട് ഇവരെ ഇതിന് അടിമകളാക്കി കഞ്ചാവ് വില്പ്പന കൊഴുപ്പിക്കുകയാണ് ചെയ്യുന്നത്.
ശിവക്ഷേത്ര പരിസരത്ത് മദ്യപിച്ച് അഴിഞ്ഞാടുന്നവരെ കോടതിയിലെത്തിച്ചാലും ജാമ്യത്തിലിറങ്ങുകയാണ് ചെയ്യുന്നത്. അതുകൊണ്ടുതന്നെയാണ് പോലീസ് പലപ്പോഴും ഇവരെ അറസ്റ്റ് ചെയ്യുവാന് മടിക്കുന്നത്.എന്നാല് ആവര്ത്തിച്ച് പൊതുശല്യമുണ്ടാക്കുന്നുവെന്ന് കോടതിയെ ബോധ്യപ്പെടുത്തിയാല് റിമാന്റ് ചെയ്യുന്നതിനുള്പ്പെടെ വകുപ്പുകള് ചേര്ക്കുവാന് കഴിയുമെന്ന് നിയമവിദഗ്ധര് ചൂണ്ടിക്കാട്ടുന്നു.
ആലുവ മണപ്പുറത്ത് അമ്പത് രൂപ നിരക്കിലാണ് ചെറിയ കുപ്പിയില് വ്യാജമദ്യം വില്പ്പന നടത്തുന്നതെന്നും ആക്ഷേപമുണ്ട്.
പ്രതിദിനം ആയിരക്കണക്കിന് ഭക്തജനങ്ങളെത്തുന്ന ആലുവ മണപ്പുറത്ത് സാമൂഹ്യദ്രോഹികളെ തടയുന്നതിനുവേണ്ടി പോലീസിന്റെ എയ്ഡ്പോസ്റ്റ് ഉടനടി സ്ഥാപിക്കണമെന്ന് എന്എസ്എസ് തോട്ടയ്ക്കാട്ടുകര കരയോഗം പ്രസിഡണ്ട് ശ്രീധര് പൊതുവാള് ആവശ്യപ്പെട്ടു.
