കോട്ടയം: ക്ഷേത്രാരാധനയില്‍ വിശ്വസിക്കുന്ന എല്ലാ വിഭാഗമാളുകള്‍ക്കും പൂജാകര്‍മ്മം ചെയ്യുവാനുള്ള അവകാശമുണ്ടാകണമെന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് അഡ്വ. എം.പി. ഗോവിന്ദന്‍ നായര്‍ അഭിപ്രായപ്പെട്ടു. കോട്ടയത്ത് കേരള ക്ഷേത്രസംരക്ഷണ സമിതി ജില്ലാ വാര്‍ഷിക സമ്മേളനത്തോടനുബന്ധിച്ചുനടന്ന പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഇക്കാര്യത്തില്‍ ദേവസ്വം ബോര്‍ഡ് ചില ശ്രമങ്ങള്‍ നടത്തിയിരുന്നു. എന്നാല്‍ പൂര്‍ണ്ണമായും വിജയിച്ചില്ലെന്നും അദ്ദേഹം പറഞ്ഞു.
സമ്മേളനത്തില്‍ വാഴൂര്‍ തീര്‍ത്ഥപാദാശ്രമം കാര്യദര്‍ശി സ്വാമി ഗരുഢധ്വജാനന്ദ അനുഗ്രഹപ്രഭാഷണം നടത്തി. ഹിന്ദുക്കളുടെ ആരാധന കേന്ദ്രവും ആശ്രയകേന്ദ്രവും ആയിരുന്നു ക്ഷേത്രങ്ങളെന്ന് അദ്ദേഹം പറഞ്ഞു. ഭാരത് ഹോസ്പിറ്റല്‍ ഡയറക്ടര്‍ ഡോ. വിനോദ് വിശ്വനാഥന്‍ അദ്ധ്യക്ഷത വഹിച്ചു. ധര്‍മ്മ ജാഗരണ്‍ സംസ്ഥാന ഉപാദ്ധ്യക്ഷന്‍ വി.കെ. വിശ്വനാഥന്‍ പ്രഭാഷണം നടത്തി. അശ്വതി എസ്. കടപ്പൂര് അഷ്ടപദി ആലപിച്ചു. ജില്ലാ അദ്ധ്യക്ഷന്‍ സി.പി. ഗോപാലകൃഷ്ണന്‍, മാതൃസമിതി ജില്ലാ അദ്ധ്യക്ഷ ശാന്ത എസ്. പിള്ള, ജനറല്‍ കണ്‍ വീനര്‍ ദാസപ്പന്‍ നായര്‍ എന്നിവര്‍ പ്രസംഗിച്ചു. കെ.കെ. മോഹന്‍ദാസ് സ്വാഗതവും ടി.കെ. വേണു നന്ദിയും രേഖപ്പെടുത്തി.
