പ്രീതയും പ്രീതിയും വരന്മാര്ക്കൊപ്പം
മുതുകുളം: മകം പിറന്ന ഇരട്ടകള്ക്ക് വരന്മാരായി ഇരട്ടകളെത്തി. തൃക്കുന്നപ്പുഴ കിഴക്കേക്കര വടക്ക് കന്നേകോണില് കിഴക്കേതില് പ്രകാശന്റെയും മഹിളാമണിയുടെയും ഇരട്ടകളായ പ്രിതയെയും പ്രീതിയെയുമാണ് താമല്ലാക്കല് വടക്ക് തൈമൂട്ടില് രമേശിന്റെയും രമണിയുടെയും ഇരട്ട മക്കളായ രതീഷും രജീഷും വിവാഹം ചെയ്തത്. ഒമാനില് ഒരേ കമ്പനിയിലെ ഉദ്യോഗസ്ഥരായ രതീഷും രജീഷും അവധിക്ക് നാട്ടിലെത്തിയപ്പോഴാണ് വിവാഹ ആലോചനകള് ആരംഭിച്ചത്. ഇരട്ടകള് തന്നെ വധുക്കളായി എത്തണമെന്ന നിര്ബന്ധമൊന്നും ഇല്ലായിരുന്നു.
എന്നാല് സമീപ പഞ്ചായത്തുകളില് നിന്നു തന്നെ ഇരട്ടകളുടെ ആലോചന എത്തി. രാജസ്ഥാനില് ബിഎസ്സി നഴ്സാണ് പ്രീതയും പ്രീതിയും, ഈ സമയത്ത് നാട്ടില് എത്തിയിരുന്നു. തുടര്ന്ന് വിവാഹം ഉറപ്പിക്കുകയായിരുന്നു. വധൂവരന്മാരുടെ അച്ഛന്മാര് നേരത്തെ തന്നെ പരിചിതരായിരുന്നെങ്കിലും മക്കളുടെ വിവാഹകാര്യമൊന്നും നേരത്തെ ചര്ച്ച ചെയ്തിരുന്നില്ല. ഏതാനും ദിവസങ്ങള്ക്കുള്ളിലാണ് പെണ്ണുകാണലും വിവാഹവുമെല്ലാം നടന്നത്.
