ആലപ്പുഴ: നരേന്ദ്രമോദി സര്‍ക്കാരിന്റെ എട്ടു മാസത്തെ ഭരണം ജനത്തിന് ദുര്‍ദിനങ്ങളാണെന്ന ആലപ്പുഴ എംപിയുടെ പ്രസ്താവന രാഷ്ട്രീയ അന്ധത ബാധിച്ചതിനാലാണെന്ന് ബിജെപി ജില്ലാ പ്രസിഡന്റ് വെള്ളിയാകുളം പരമേശ്വരന്‍. റെയില്‍വേ ബജറ്റില്‍ അര്‍ഹമായ പരിഗണനയാണ് ലഭിച്ചത്. കേന്ദ്ര ബജറ്റില്‍ സംസ്ഥാനത്തിന് മുന്‍കാലങ്ങളിലേക്കാള്‍ കൂടുതല്‍ പദ്ധതി വിഹിതം വര്‍ദ്ധിപ്പിച്ചതും മൂന്നര പതിറ്റാണ്ടായി മുടങ്ങിക്കിടന്ന ആലപ്പുഴ ബൈപാസിന്റെ നിര്‍മ്മാണ നടപടികള്‍ ആരംഭിച്ചതും മോദി സര്‍ക്കാരിന്റെ വെറും എട്ടു മാസത്തെ ഭരണം കൊണ്ട് ജനത്തിനുണ്ടായ നല്ല ദിനങ്ങളാണെന്ന് എംപി മറക്കരുതെന്ന് അദ്ദേഹം പറഞ്ഞു.
ആലപ്പുഴയ്‌ക്ക് നാലു കേന്ദ്രമന്ത്രിമാര്‍ പത്ത് വര്‍ഷം ഉണ്ടായിട്ടും കൊണ്ടുവരാന്‍ സാധിക്കാത്ത വികസന പദ്ധതികളാണ് വെറും എട്ടു മാസം കൊണ്ട് നടപ്പാക്കാന്‍ സാധിച്ചത്. ഇതിന്റെ ജാള്യതയും രാഷ്ട്രീയ തിമിരവും ബാധിച്ചത് മൂലമാണ് മോദി സര്‍ക്കാരിനെതിരെ അടിസ്ഥാന രഹിതമായ ആരോപണങ്ങള്‍ എംപി നടത്തുന്നതെന്നും വെള്ളിയാകുളം കുറ്റപ്പെടുത്തി.
