വള്ളികുന്നം: ഹര്ത്താലിനോട് അനുബന്ധിച്ച് ബിജെപി നടത്തിയ പ്രകടനത്തില് പങ്കെടുത്ത് മടങ്ങുകയായിരുന്നവര്ക്ക് നേരെ എസ്ഡിപിഐക്കാരുടെ ആക്രമണം. രണ്ട് പേര്ക്ക് പരിക്കേറ്റു. കെ.എം. സദനത്തില് വി. മുരളീധരന് (61), ശ്രീ മന്ദിരത്തില് ശശി (58) എന്നിവര്ക്കാണ് പരിക്കേറ്റത്. ഇവരെ മാവേലിക്കര ജില്ലാ ആശുപത്രിയില് പ്രവേശിപ്പിച്ചു. കഴിഞ്ഞദിവസം ഉച്ചയ്ക്ക് വള്ളികുന്നം കാമ്പിശേരി ജങ്ഷനില് വച്ച് മുപ്പതോളം വരുന്ന എസ്ഡിപിഐക്കാരാണ് ആക്രമണം നടത്തിയത്.
ആര്എസ്എസ് വള്ളികുന്നം മണ്ഡല് ശാരീരിക് ശിക്ഷണ് പ്രമുഖായിരുന്ന ചെങ്കിലാത്ത് വിനോദിന്റെ കൊലപാതകികളായ എസ്ഡിപിഐ നിയോജക മണ്ഡലം പ്രസിഡന്റ് ഉള്പ്പെടെയുള്ളവര്ക്ക് ജീവപര്യന്തം ശിക്ഷ ലഭിച്ചപ്പോള് മുതല് എസ്ഡിപിഐക്കാര് ആക്രമണ പദ്ധതി തയ്യാറാക്കി വരികയായിരുന്നു. ആക്രമണ സാദ്ധ്യതയുണ്ടെന്ന രഹസ്യാന്വേഷണ വിഭാഗത്തിന്റെ റിപ്പോര്ട്ടിനെ തുടര്ന്ന് പ്രദേശത്തെ എസ്ഡിപിഐ കേന്ദ്രങ്ങള് പോലീസ് നിരീക്ഷണത്തിലായിരുന്നു. ഇതിനിടെയാണ് ആക്രമണം നടത്തിയത്.
ഞങ്ങളുടെ നേതാക്കള് ജയിലില് കിടക്കുമ്പോള് നിങ്ങള് പുറത്തു വിഹരിക്കേണ്ട എന്നു പറഞ്ഞായിരുന്നു ആക്രമണമെന്ന് പരിക്കേറ്റ് ആശുപത്രിയില് കിടക്കുന്നവര് പറഞ്ഞു. ബിജെപി പ്രവര്ത്തകരെ ആക്രമിച്ച മുഴുവന് എസ്ഡിപിഐക്കാരെയും അറസ്റ്റ് ചെയ്യണമെന്ന് ബിജെപി പഞ്ചായത്ത് കമ്മറ്റി പ്രസിഡന്റ് കെ.വി. അരവിന്ദാക്ഷന്, ജനറല് സെക്രട്ടറി രാജേന്ദ്രനാഥ് എന്നിവര് ആവശ്യപ്പെട്ടു.
