ബെയ്‌റൂട്ട്: ഐഎസ് ഭീകരര്‍ റഷ്യന്‍ ചാരന്‍മാരെ വെടിവെച്ചു കൊല്ലുന്ന ദൃശ്യങ്ങള്‍ പുറത്ത് വിട്ടു. കൊലപാതക ദൃശ്യങ്ങളുമായുള്ള ഐഎസിന്റെ വീഡിയോയാണ് വീണ്ടും പുറത്തു വന്നിരിക്കുന്നത്. റഷ്യന്‍ രഹസ്യാന്വേഷണ വിഭാഗത്തിനു വേണ്ടി പ്രവര്‍ത്തിച്ച രണ്ടു ചാരന്‍മാരെയാണ് വെടിവച്ച് കൊല്ലുന്നത്. ദൃശ്യങ്ങളില്‍ രഹസ്യാന്വേഷകരെ ഒരു കുട്ടി വെടിവച്ച് കൊല്ലുന്ന രംഗങ്ങളാണ് ചിത്രീകരിച്ചിരിക്കുന്നത്.
കൊല്ലപ്പെട്ട രണ്ടു പേരും തങ്ങള്‍ റഷ്യന്‍ രഹസ്യാന്വേഷണ വിഭാഗത്തിനായി ചാരപ്രവര്‍ത്തി നടത്താന്‍ റിക്രൂട്ട് ചെയ്യപ്പെട്ടവരാണ് വെളിപ്പെടുത്തുന്നുണ്ട്. ഒരാള്‍ താന്‍ കസാഖിസ്ഥാന്‍ സ്വദേശിയാണെന്ന് പറയുന്നുണ്ട്. ഐഎസ് പോരാളികളെക്കുറിച്ചുള്ള വിവരങ്ങള്‍ ശേഖരിക്കാനാണ് തങ്ങള്‍ സിറിയയില്‍ എത്തിയതെന്നും ഇവരുവരും സമ്മതിക്കുന്നുണ്ട്.
നീണ്ട മുടിയുള്ള പട്ടാളത്തിന്റേതു പോലുള്ള വേഷം ധരിച്ച കുട്ടി ഒപ്പമുള്ള ഐഎസ് പോരാളിയുടെ നിര്‍ദ്ദേശാനുസരണം ഇരുവരെയും വെടിവെയ്‌ക്കുന്നതായാണ് ദൃശ്യങ്ങളില്‍ കാണുന്നത്.
