കുമളി : പെന്തക്കോസ്തുവിഭാഗം നടത്തുന്ന അനാഥാലയത്തില് അന്തേവാസികളായ പെണ്കുട്ടികള്ക്ക് പീഡനം. പരാതി നല്കിയിട്ടും കുറ്റക്കാരനായ പാസ്റ്ററിനെതിരെ നടപടിയെടുക്കുന്നില്ല. വണ്ടിപ്പെരിയാര് പോലീസ് സ്റ്റേഷന് പരിധിയില് പ്രവര്ത്തിക്കുന്ന അനാഥാലയത്തിലെ രണ്ട് പെണ്കുട്ടികള്ക്കാണ് പാസ്റ്ററില് നിന്നും ലൈംഗിക അതിക്രമമുണ്ടായത്. ഇത് സംബന്ധിച്ച് വിദ്യാര്ത്ഥിനികള് പഠിക്കുന്ന സ്കൂളില് പരാതി നല്കി. ഈ പരാതി വണ്ടിപ്പെരിയാര് പോലീസിനു കൈമാറുകയും ചെയ്തു.
വനിത എസ്.ഐയുടെ നേതൃത്വത്തില് സംഘം പെണ്കുട്ടിയുടെ മൊഴിയെടുത്തപ്പോള് പീഡനവിവരം പറയുകയും ചെയ്തിരുന്നു. അനാഥാലയത്തില് പ്രാര്ത്ഥനയ്ക്കെത്തുന്ന ഒരു പാസ്റ്റര് അപമാനിക്കാന് ശ്രമിച്ചു എന്നാണ് പെണ്കുട്ടി മൊഴി നല്കിയിരിക്കുന്നത്. ഇതേത്തുടര്ന്ന് കേസ് രജിസ്റ്റര് ചെയ്തെന്ന് വണ്ടിപ്പെരിയാര് പോലീസ് പറയുന്നുണ്ട്. എന്നാല് അന്വേഷണം നടത്തുകയോ പ്രതിയെ അറസ്റ്റ് ചെയ്യുകയോ ചെയ്തിട്ടില്ല.
പീഡനത്തിനിരയായ മറ്റൊരു കുട്ടി നല്കിയ പരാതി പോലീസ് മുക്കിയതായി അക്ഷേപം ഉയര്ന്നിരിക്കുകയാണ്. കുട്ടികള് പഠിക്കുന്ന ട്രൈബല് സ്കൂളിലെ ഒരു അധ്യാപകന് വിവാദ അനാഥാലയത്തിലെ സ്ഥിരം സന്ദര്ശകനാണ്. അടുത്തിടെ പരാതി നല്കിയ ഒരു വിദ്യാര്ത്ഥിനിയെ സ്കൂളില് നിന്നും മാറ്റി പാര്പ്പിച്ചിരിക്കുകയാണ്. പീഡനവിവരം ചൈല്ഡ്ലൈന് അധികൃതരെ അറിയിക്കാതിരിക്കാനാണ് സ്കൂള് അധികൃതരുടെ ഒത്താശയോടെ നീക്കം നടത്തിയതെന്നാണ് ആക്ഷേപം.
