അമേരിക്കന് രാഷ്ട്രീയത്തിലും ഭാരത വംശജരായ സ്ത്രീകളുടെ സാന്നിദ്ധ്യം. കഴിഞ്ഞയാഴ്ച അമേരിക്കന് സെനറ്റിലേക്കും പ്രതിനിധിസഭകളിലേക്കും നടന്ന തെരഞ്ഞെടുപ്പില് ഭാരതവംശജരായ അഞ്ച് വനിതകളാണ് തെരഞ്ഞെടുക്കപ്പെട്ടത്. കാലിഫോര്ണിയ അറ്റോര്ണി ജനറലായി തെരഞ്ഞെടുക്കപ്പെട്ട കമല ഹാരീസ്, ഗവര്ണര് സ്ഥാനത്തേക്ക് തെരഞ്ഞെടുക്കപ്പെട്ട നിക്കി ഹാലെ, അമേരിക്കന് സെനറ്റിലേക്ക് തെരഞ്ഞെടുക്കപ്പെട്ട പ്രമീള ജയ്പാല്, പ്രതിനിധിസഭകളിലേക്ക് തെരഞ്ഞെടുക്കപ്പെട്ട അരുണ മില്ലര്, തുള്സി ഗബാര്ഡ് എന്നിവരാണ് വിജയം വരിച്ച വനിതകള്.
അറ്റോര്ണി ജനറലായി തെരഞ്ഞെടുക്കപ്പെട്ട കമല ഹാരീസ് ഡമോക്രാറ്റിക് സ്ഥാനാര്ത്ഥിയായാണ് മത്സരിച്ചത്. തുടര്ച്ചയായി രണ്ടാംവട്ടമാണ് കമല വിജയിക്കുന്നത്. കമലയുടെ അമ്മ ചെന്നൈയില്നിന്നും അമേരിക്കയിലേക്ക് കുടിയേറിയ ശ്യാമള ഗോപാലും അച്ഛന് ജമൈക്കക്കാരനായ പ്രൊഫ. ഡൊണാള്ഡ് ഹാരീസുമാണ്. ഓക്ലാന്റിലാണ് കമല ഹാരീസ് ജനിച്ചത്. ഹവാര്ഡ് സര്വകലാശാലയില്നിന്നും ബിരുദവും കാലിഫോര്ണിയ സര്വകലാശാലയില്നിന്നും നിയമബിരുദവുമെടുത്തിട്ടുണ്ട്.
സൗത്ത് കരോലിനയില് ഗവര്ണറായി തെരഞ്ഞെടുക്കപ്പെട്ട നിക്കി ഹാലെ രണ്ടാം തവണയാണ് ഗവര്ണറായി തെരഞ്ഞെടുക്കപ്പെടുന്നത്. അമേരിക്കയിലെ ജനകീയ ഗവര്ണര്മാരില് ഒരാളായും നിക്കി പരിഗണിക്കപ്പെടുന്നുണ്ട്.
50 കാരിയായ അരുണ മില്ലര് മെരിലാന്റ് ലെജിസ്ലേച്ചറിലേക്ക് തെരഞ്ഞെടുക്കപ്പെടുന്ന ആദ്യ ഭാരത വംശജയാണ്. അരുണയ്ക്ക് എട്ടു വയസ്സുള്ളപ്പോഴാണ് അവരുടെ കുടുംബം അമേരിക്കയിലേക്ക് ചേക്കേറിയത്. ന്യൂയോര്ക്കില് സ്കൂള് വിദ്യാഭ്യാസം പൂര്ത്തിയാക്കി മില്ലര് മിസൗറി യൂണിവേഴ്സിറ്റിയില് നിന്നും സിവില് എഞ്ചിനീയറിംഗില് ബിരുദവും കരസ്ഥമാക്കിയിട്ടുണ്ട്.
അമേരിക്കന് സെനറ്റിലേക്കാണ് പ്രമീള ജയ്പാല് തെരഞ്ഞെടുക്കപ്പെട്ടത്. എഴുത്തുകാരിയും മനുഷ്യാവകാശ പ്രവര്ത്തകയുമായ പ്രമീള ജയ്പാല് ഡെമൊക്രാറ്റിക് പാര്ട്ടി സ്ഥാനാര്ത്ഥിയായാണ് മത്സരിച്ചത്. 2008 ല് ഗവര്ണര് ഗ്രിഗോറി പ്രമീളയെ ന്യൂ അമേരിക്കന് പോളിസി കൗണ്സില് ഉപാധ്യക്ഷയായി നിയമിച്ചു. ഇവരുടെ പ്രവര്ത്തനങ്ങള്ക്ക് നിരവധി അംഗീകാരങ്ങളും അവാര്ഡുകളും ലഭിച്ചിരുന്നു. 16-ാം വയസ്സില് ഭാരതത്തില് നിന്നും അമേരിക്കയിലെത്തിയ പ്രമീളയ്ക്ക് 2000 ത്തില് അമേരിക്കന് പൗരത്വം ലഭിച്ചു.
തുള്സി ഗബാര്ഡ് അമേരിക്കന് ജനപ്രതിനിധി സഭയിലേക്ക് തെരഞ്ഞെടുക്കപ്പെട്ടിരിക്കുന്നത് രണ്ടാം വട്ടമാണ്. ഹവായിയിലെ ആര്മി നാഷണല് ഗാര്ഡില് ക്യാപ്റ്റനാണ്. ഹിന്ദുമത വിശ്വാസിയായ ഗബാര്ഡ് മതഗ്രന്ഥമെന്ന നിലയില് ഭഗവദ്ഗീതയില്തൊട്ടാണ് ആദ്യമായി ജനപ്രതിനിധി സഭയിലേക്ക് തെരഞ്ഞെടുക്കപ്പെട്ടപ്പോള് സത്യപ്രതിജ്ഞ ചെയ്തത്. 21 -ാംവയസ്സിലാണ് ആദ്യവട്ടം ഗബാര്ഡ് സ്റ്റേറ്റ് ലെജിസ്ലേച്ചറിലേക്ക് തെരഞ്ഞെടുക്കപ്പെടുന്നത്. ഹവായിയുടെ ചരിത്രത്തിലാദ്യമായിരുന്നു ഏറ്റവും പ്രായകുറഞ്ഞ വ്യക്തി സംസ്ഥാന ലെജിസ്ലേച്ചറിലേക്ക് തെരഞ്ഞെടുക്കപ്പെടുന്നത്.
