കൊച്ചി: കളമശേരി നിയോജകമണ്ഡലത്തിലെ പള്ളിലാങ്കര 118-ാം നമ്പര് പോളിങ് ബൂത്തിലെ റീപോളിങ് സമാധാനപരമായി പൂര്ത്തിയായി. രാവിലെ ഏഴിനാരംഭിച്ച വോട്ടെടുപ്പ് വൈകീട്ട് ആറിനു പൂര്ത്തിയാകുമ്പോള് 80.38 ശതമാനം പേര് വോട്ടു രേഖപ്പെടുത്തി. ബൂത്തില് ആകെയുള്ള 1172 വോട്ടര്മാരില് ഇന്നലെ 942 പേര് വോട്ടു ചെയ്തു. ഇതില് 466 പുരുഷന്മാരും 476 സ്ത്രീകളുമാണ്. കഴിഞ്ഞ 10ന് ബൂത്തില് 73.37 ശതമാനം പേരാണ് വോട്ടു ചെയ്തത്. റീപോളിങ്ങില് ഏഴുശതമാനത്തോളം വോട്ട് കൂടുതലായി ചെയ്തിട്ടുണ്ട്.
രാവിലെ പോളിങ് ബൂത്തായ കളമശേരി ഗവ.പോളി ടെക്നിക് കവാടത്തിനു മുമ്പിലുണ്ടായ ചെറിയ സംഘര്ഷമൊഴിച്ചാല് അനിഷ്ടസംഭവങ്ങളൊന്നും ഉണ്ടായില്ല. യു.ഡി.എഫ്.-ആപ് പ്രവര്ത്തകര് തമ്മിലാണ് നേരിയ വാക്കേറ്റമുണ്ടായത്. സ്ഥലത്തുണ്ടായിരുന്ന ഉന്നത പൊലീസ് ഉദ്യോഗസ്ഥരുടെയും നേതാക്കളുടെയും സമയോചിതമായ ഇടപെടലാണ് പ്രശ്നം രമ്യമായി ഒതുക്കിയത്.
തുടര്ന്ന് ബൂത്തിലെത്തിയ ജില്ല തിരഞ്ഞെടുപ്പ് ഓഫീസറായ ജില്ല കളക്ടര് എം.ജി.രാജമാണിക്യം കവാടത്തിനുവെളിയിലെ ബൂത്തിലെ കൊടി തോരണങ്ങളും മറ്റ് പ്രചരണ സാമഗ്രികളും അഴിച്ചുമാറ്റാന് ഉത്തരവിട്ടു. തിരഞ്ഞെടുപ്പ് ഡപ്യൂട്ടി കളക്ടര് എസ്.ഷാനവാസിന്റെ നേതൃത്വത്തില് ഉദ്യോഗസ്ഥവൃന്ദം എല്ലാ കക്ഷികളുടെയും ബൂത്തുകളില് നിന്ന് പ്രചരണസാമഗ്രികള് അഴിച്ചുമാറ്റാന് നിര്ദേശിച്ചു. പ്രവര്ത്തകര് സ്വമേധയ ഇവ അഴിച്ചുമാറ്റുകയും ചെയ്തു. പിന്നീട് ശക്തമായ പൊലീസ് കാവലിലായിരുന്നു പോളിങ് ബൂത്തും പരിസരവും.
നാല് സെറ്റ് മെഷീനുകളാണ് റീപോളിങ്ങിനായി സജ്ജമാക്കിയിരുന്നത്. റീപോളിങ് നിരീക്ഷകനായ കര്ണാടക കേഡര് ഐ.എ.എസ്. ഉദ്യോഗസ്ഥന് പൊന്നുരാജ് സദാസമയവും ബൂത്തില് ഉണ്ടായിരുന്നു. രാവിലെ ഏഴിനു തുടങ്ങിയ പോളിങ് സാവധാനമെങ്കിലും വോട്ടര്മാരുടെ ശക്തമായ സാന്നിധ്യമാണ് കാണിച്ചത്.
