കോഴിക്കോട്: 2026-ലെ സെന്സസിന്റെ ഒന്നാംഘട്ട പ്രവര്ത്തനങ്ങള് വിജയകരമായി പൂര്ത്തിയാക്കിയ അദ്ധ്യാപകര്ക്ക് അര്ഹതപ്പെട്ട പ്രതിഫലം കാലതാമസം കൂടാതെ വിതരണം ചെയ്യണമെന്ന് എന്ടിയു സംസ്ഥാന ജനറല് സെക്രട്ടറി ടി. അനൂപ്കുമാര് ആവശ്യപ്പെട്ടു. യാതൊരു മുന്നൊരുക്കവുമില്ലാതെയും റവന്യൂ വകുപ്പിന്റെ കാര്യക്ഷമമായ പിന്തുണയില്ലാതെയും അദ്ധ്യാപകര് അതീവ പ്രയാസകരമായ സാഹചര്യങ്ങളിലാണ് ഇത്തവണ സെന്സസ് ഡ്യൂട്ടി നിര്വഹിച്ചത്. പല സ്ഥലങ്ങളിലും ചില സെന്സസ് ചാര്ജ് ഓഫീസര്മാരുടെയും തഹസില്ദാര്മാരുടെയും പെരുമാറ്റം സര്ക്കാര് ഉദ്യോഗസ്ഥര്ക്കു യോജിച്ചതല്ലായിരുന്നു.
ജയില് ശിക്ഷ ഉള്പ്പെടെയുള്ള ഭീഷണികള് ഉയര്ത്തിക്കാട്ടി അദ്ധ്യാപികമാരുള്പ്പെടെയുള്ള ജീവനക്കാരോട് മാന്യതയ്ക്ക് നിരക്കാത്ത സമീപനമാണ് സ്വീകരിക്കപ്പെട്ടത്. വിദ്യാലയ വര്ഷാരംഭത്തില് കനത്ത മഴയുള്പ്പെടെയുള്ള നിരവധി പ്രയാസങ്ങള്ക്കൊപ്പം ദുര്ഘട പ്രദേശങ്ങളിലൂടെ സഞ്ചരിച്ച് വീടുകള്ക്ക് നമ്പറിടലും പ്ലാന് തയ്യാറാക്കലും തുടങ്ങി എല്ലാ ഉത്തരവാദിത്വങ്ങളും അദ്ധ്യാപകര് ആത്മാര്ത്ഥമായി പൂര്ത്തിയാക്കി.
ഓണപ്പരീക്ഷക്ക് മുമ്പ് പഠിപ്പിച്ച് തീര്ക്കേണ്ട പാഠഭാഗങ്ങള് പൂര്ത്തിയാക്കി വിദ്യാര്ത്ഥികളോടുള്ള കടമയും രാജ്യത്തോടുള്ള ഉത്തരവാദിത്വവും ഒരുപോലെ നിര്വഹിച്ചവരാണ് അധ്യാപകര്.
സെന്സസ് പ്രവര്ത്തനത്തിനുള്ള ഫണ്ട് കേന്ദ്ര ആഭ്യന്തര മന്ത്രാലയത്തില് നിന്ന് ലഭ്യമായിട്ടുള്ളതാണ്. അതുകൊണ്ടു തന്നെ പ്രതിഫല വിതരണം വൈകിപ്പിക്കേണ്ട ഒരു കാരണവും ഇല്ല. റവന്യൂ വകുപ്പിന്റെ പതിവ് ചുവപ്പുനാടയില് ഈ വിഷയത്തെ കുരുക്കാതെ, ഒന്നാംഘട്ട സെന്സസ് പ്രവര്ത്തനം പൂര്ത്തിയാക്കിയ എല്ലാ അധ്യാപകര്ക്കും അര്ഹതപ്പെട്ട പ്രതിഫലം അടിയന്തരമായി അനുവദിക്കാന് റവന്യൂ വകുപ്പ് നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു.
