ആലുവ: ആലുവ മേഖലയില് മൊബെയില് ഗുണ്ടാസംഘങ്ങള് സജീവം. പോലീസിനും മറ്റും പിടികൊടുക്കാതെ ആര്ഭാട വാഹനങ്ങളില് സഞ്ചരിച്ചാണ് ഇവര് അക്രമപ്രവര്ത്തനങ്ങള്ക്ക് നേതൃത്വം നല്കുന്നത്. അക്രമം നടത്താനെത്തുമ്പോള് ഇവര്ക്ക് നിരവധി അകമ്പടി വാഹനങ്ങളുമുണ്ടാകും. പലപ്പോഴും അക്രമം നടത്തി ഉടന്തന്നെ അന്യസംസ്ഥാനത്തേക്ക് കടക്കുകയും ചെയ്യും.
വിവിധ കേസുകളില് ഒളിവില് കഴിയുമ്പോള്തന്നെ ഭായിനസീര്, സാംലോനന് എന്നിവര് ഇത്തരത്തില് വാഹനങ്ങളിലെത്തി അക്രമങ്ങള് നടത്തിയിട്ടുണ്ട്. ഇവരുടെ കൂട്ടാളികളായി പ്രവര്ത്തിക്കുന്ന മറ്റ് ചിലരെക്കുറിച്ച് വിവരം ലഭിച്ചിട്ടുണ്ട്. തെളിയിക്കപ്പെടാതെ കിടക്കുന്ന നിരവധി കേസുകള് ഇവരെ ചോദ്യം ചെയ്യുന്നതിലൂടെ തെളിയുകയും ചെയ്യും. പലപ്പോഴും വാഹനങ്ങളിലെത്തി ആക്രമിക്കാനുദ്ദേശിക്കുന്നവരെ പിടികൂടി വാഹനത്തില് കയറ്റിയശേഷം പ്രത്യേക തരത്തിലുള്ള ടേപ്പ് ഉപയോഗിച്ച് വായ പൊത്തുകയാണ് ചെയ്യുന്നത്. ഈ ടേപ്പ് കഴിഞ്ഞദിവസം ഗുണ്ടാസംഘത്തില്നിന്നും പോലീസ് പിടിച്ചെടുത്തിട്ടുണ്ട്. പല ഗുണ്ടാസംഘങ്ങള്ക്കും സഹായികളായി ചില സ്ത്രീകളും പ്രവര്ത്തിക്കുന്നതായി വിവരം ലഭിച്ചിട്ടുണ്ട്.
