പള്ളുരുത്തി: പട്ടികജാതിയില്‍പ്പെട്ട വീട്ടമ്മയെ ജാതിപ്പേര്‌ വീളിച്ചാക്ഷേപിച്ചെന്ന പരാതിയില്‍ കുമ്പളങ്ങി ഒന്നാം വാര്‍ഡ്‌ മെമ്പര്‍ സൂസന്‍ ജോസഫിനെതിരെ പള്ളുരുത്തി പോലീസ്‌ കേസെടുത്തു.
കുമ്പളങ്ങി പള്ളിക്കപ്പറമ്പില്‍ വീട്ടില്‍ സുശീല രാജന്‍ നല്‍കിയ പരാതിയിലാണ്‌ പോലീസ്‌ നടപടി.
കോണ്ഗ്രസ് വാര്‍ഡ്‌ മെമ്പറായ സൂസന്‍ ജോസഫിനെ ഗ്രാമപഞ്ചായത്ത്‌ പ്രസിഡന്റാക്കുന്നതിനുവേണ്ടി എംഎല്‍എ ഡൊമിനിക്‌ പ്രസന്റേഷന്‍ വിഭാഗം നീക്കം നടത്തുന്നതിനിടയിലാണ്‌ കോണ്ഗ്രസ്-എ വിഭാഗത്തിന്‌ തിരിച്ചടിയായിരിക്കുന്നത്‌.
കഴിഞ്ഞ 25 ന്‌ കുമ്പളങ്ങിയില്‍ കോണ്ഗ്രസ് എ-ഐ വിഭാഗം അംഗങ്ങള്‍ ചേര്‍ന്ന്‌ കെ.വി. തോമസ്‌ വിഭാഗക്കാരിയായ പഞ്ചായത്ത്‌ പ്രസിഡന്റ്‌ ഉഷാ പ്രദീപിനെതിരെ അവിശ്വാസപ്രമേയത്തിന്‌ നോട്ടീസ് നല്‍കിയിരുന്നു. അവിശ്വാസപ്രമേയം പാസാകാതെവന്നതിനെത്തുടര്‍ന്ന്‌ പരാതിക്കാരിയുടെ വീടിന്‌ മുന്നില്‍ പടക്കം പൊട്ടിച്ച സാഹചര്യത്തിലാണ്‌ സൂസന്‍ ജോസഫ്‌ ഇവരെ ജാതിപ്പേര്‌ വിളിക്കുകയും അസഭ്യം പറയുകയും ചെയ്തതെന്ന്‌ പരാതിയില്‍ പറയുന്നു.
എ-ഐ വിഭാഗങ്ങള്‍ ഒത്തുചേര്‍ന്ന്‌ സൂസന്‍ ജോസഫിനെ പഞ്ചായത്ത്‌ പ്രസിഡന്റ്സ്ഥാനത്തേക്ക്‌ ഉയര്‍ത്തിക്കാട്ടി നടത്തുന്ന പ്രവര്‍ത്തനങ്ങള്‍ക്ക്‌ തടയിടുന്നതിന്‌ മറുവിഭാഗം നടത്തിയ ഗൂഢനീക്കമാണ്‌ പരാതിക്ക്‌ പിന്നിലെന്ന്‌ ഡൊമിനിക്‌ വിഭാഗം പറയുന്നു.
