കൊച്ചി: പ്രമുഖ ഹിന്ദുസ്ഥാനി സംഗീതജ്ഞ അഭ്രാദിത മൈത്ര ബാനര്ജി നയിക്കുന്ന സംഗീത സദസ് നാളെ ഡര്ബാര് ഹാള് ഓപ്പണ് എയര് ഓഡിറ്റോറിയത്തില് വൈകുന്നേരം 6.30-ന് നടക്കും. എറണാകുളം ജില്ല ഭരണകൂടവും ഡി.ടി.പി.സിയും കേരള സംഗീത നാടക അക്കാദമിയും സംയുക്തമായി നടത്തിവരുന്ന പ്രതിവാരകലാസന്ധ്യയുടെ ഭാഗമായാണ് ഇത്. ശനിയാഴ്ചകളില് നടത്തിവരുന്ന വൈവിധ്യമാര്ന്ന കലാവിരുന്ന് ഇക്കുറി ഞായറാഴ്ചയിലേയ്ക്കു മാറ്റുകയായിരുന്നു.
പ്രശസ്ത തിരുവാതിര കലാകാരിയും അധ്യാപികയുമായ മാലതി മേനോന്റെ നേതൃത്വത്തില് മൂവായിരത്തോളം അംഗനമാര് അരങ്ങേറുന്ന റിക്കാര്ഡ് തിരുവാതിര നൃത്തപരിപാടി ശനിയാഴ്ച ഡര്ബാര് ഹാള് ഗ്രൗണ്ടിലെ വേദിയില് നടക്കുന്നതിനാലാണ് ഇത്.
തലസ്ഥാനനഗരിയില് മുക്താംഗന് എന്ന പേരില് സംഗീത വിദ്യാലയം നടത്തുന്ന അഭ്രാദിത, സൃഷ്ടി എന്ന പേരില് ഒരു സംഗീത ബാന്ഡും നടത്തുന്നുണ്ട്. തിരുവനന്തപുരം നാട്യവേദ സംഗീത കോളജിന്റെ ഓണററി പ്രിന്സിപ്പല് കൂടിയായ ഗായിക, കേരള സര്വകലാശാലയുടെ സംഗീതവിഭാഗത്തില് അധ്യാപികയുമാണ്. പ്രവേശനം സൗജന്യമായിരിക്കുമെന്ന് ജില്ല കളക്ടര് പി.ഐ ഷെയ്ക്ക് പരീത് അറിയിച്ചു.
