കോട്ടയം: നാട്ടകം ഗവ.കോളേജില്‍ എസ്എഫ്‌ഐക്കാര്‍ ഏകപക്ഷീയമായി നടത്തുന്ന അക്രമത്തെ മറച്ചുവയ്‌ക്കാന്‍ സിപിഎം നടത്തുന്ന ശ്രമത്തിന്റെ ഭാഗമായാണ് കഴിഞ്ഞ ദിവസങ്ങളില്‍ മറിയപ്പള്ളിയിലെ ആര്‍എസ്എസ് പ്രവര്‍ത്തകരുടെ വീടുകള്‍ക്കു നേരെ നടന്ന ആക്രമണമെന്ന് ഹിന്ദു ഐക്യവേദി ജില്ലാ കമ്മറ്റി കുറ്റപ്പെടുത്തി.
മറിയപ്പള്ളി മഹാദേവക്ഷേത്രം സപ്താഹകമ്മറ്റി സെക്രട്ടറിയും ആര്‍എസ്എസ് ശാഖാ സമ്പര്‍ക്കപ്രമുഖുമായ പുളിവേലില്‍ വീട്ടില്‍ സന്തോഷ്‌കുമാറിന്റെ വീടും വാഹനവും അടിച്ചു തകര്‍ത്തു. സന്തോഷിനെ കമ്പിവടികൊണ്ട് അടിച്ച് നിലത്തിട്ട ശേഷം അമ്മയെയും മൂന്നുമാസം ഗര്‍ഭിണിയായ ഭാര്യയെയും അക്രമികള്‍ ക്രൂരമായി മര്‍ദ്ദിച്ചു. കമ്പ്യൂട്ടര്‍ അടക്കം വീട്ടിലെ സകല ഗൃഹോപകരണങ്ങളും നശിപ്പിക്കപ്പെട്ടു.
പാര്‍ട്ടി പ്ലീനത്തിനുശേഷം എല്ലാ ജില്ലകളിലെയും രാഷ്‌ട്രീയ എതിരാളികളെ ഉന്മൂലനം ചെയ്യാനുള്ള ഗൂഢലക്ഷ്യമാണ് ഇതിനു പിന്നില്‍. പ്ലീനത്തില്‍ ഹൈന്ദവാചാരങ്ങള്‍ക്കു വിലക്കു കല്പിക്കുകയും മതന്യൂനപക്ഷങ്ങളെ സംരക്ഷിക്കുകയും ചെയ്യുന്ന സിപിഎം, ഗുരുദേവനെ ആരാധിക്കുകയും പൂജിക്കുകയും ചെയ്യുന്ന സംഘപരിവാര്‍ പ്രവര്‍ത്തകര്‍ ഗുരുദേവ ചിത്രത്തെ നശിപ്പിക്കുവാന്‍ ശ്രമിച്ചു എന്ന വ്യാജ പ്രചരണം നടത്തുകയാണ്. തുടര്‍ച്ചയായി സിപിഎം നടത്തുന്ന സംഘടനാ സ്വാതന്ത്ര്യനിഷേധത്തിനും അക്രമത്തിനും സമുദായ സ്പര്‍ദ്ധ ഉണ്ടാക്കുന്ന നടപടികളേയും സമൂഹം തിരിച്ചറിയണമെന്നും നിരപരാധികളായ സംഘപരിവാര്‍ സംഘടനയുടെ പ്രവര്‍ത്തകരെ കള്ളക്കേസില്‍ കുടുക്കുവാന്‍ ശ്രമിക്കുന്നതില്‍ നിന്ന് പിന്തിരിയണമെന്ന് ഹിന്ദു ഐക്യവേദി ആവശ്യപ്പെട്ടു. അല്ലാത്തപക്ഷം ഇത് സമൂഹത്തിലുണ്ടാക്കുന്ന കുഴപ്പങ്ങള്‍ക്ക് പൂര്‍ണ്ണ ഉത്തരവാദിത്വം സിപിഎമ്മിനും ഡിവൈഎഫ്‌ഐയ്‌ക്കും ആയിരിക്കുമെന്നും ഹിന്ദു ഐക്യവേദി ജില്ലാ ജനറല്‍ സെക്രട്ടറി എ.ടി.തുളസീധരന്‍ അറിയിച്ചു.
നാട്ടകം ഗവ.കോളേജിലെ എസ്എഫ്‌ഐ ആക്രമണത്തിന്റെ മറവില്‍ പ്രദേശത്ത് സിപിഎം ഡിവൈഎഫ്‌ഐ പ്രവര്‍ത്തകര്‍ നടത്തുന്ന അക്രമരാഷ്‌ട്രീയം അവസാനിപ്പിക്കണമെന്ന് യുവമോര്‍ച്ച ജില്ലാ പ്രസിഡന്റ് എസ്.രതീഷ് ആവശ്യപ്പെട്ടു. ഇത്തരം ആസൂത്രിത അക്രമങ്ങള്‍ അവസാനിപ്പിച്ചില്ലെങ്കില്‍ ജനകീയ പ്രതിരോധം സംഘടിപ്പിക്കുവാന്‍ യുവമോര്‍ച്ച നേതൃത്വം കൊടുക്കുമെന്നും മുന്നറിയിപ്പ് നല്‍കി. പ്രദേശത്ത് അക്രമം സൃഷ്ടിച്ച് സാമുദായിക സ്പര്‍ദ്ധ വളര്‍ത്തി രാഷ്‌ട്രീയ മുതലെടുപ്പ് നടത്തുന്ന സിപിഎം നടപടിക്കെതിരെയും യുവമോര്‍ച്ച ജില്ലാ കമ്മറ്റി ശക്തമായി പ്രതിഷേധിച്ചു.
യോഗത്തില്‍ ബിജെപി കോട്ടയം നിയോജകമണ്ഡലം പ്രസിഡന്റ് സി.എന്‍.സുഭാഷ്, യുവമോര്‍ച്ച ജില്ലാ വൈസ് പ്രസിഡന്റ് ശരത്കുമാര്‍, ജില്ലാ സെക്രട്ടറി വി.പി.മുകേഷ്, യുവമോര്‍ച്ച മണ്ഡലം പ്രസിഡന്റ് കെ.എസ്.ഗോപന്‍, നിയോജകമണ്ഡലം വൈസ് പ്രസിഡന്റ് എം.എന്‍.അനില്‍കുമാര്‍, മുനിസിപ്പല്‍ സൗത്ത് കമ്മറ്റി പ്രസിഡന്റ് ഷാജി തൈച്ചിറ എന്നിവര്‍ യോഗത്തില്‍ സംസാരിച്ചു.
