മാഡ്രിഡ്: സ്പാനിഷ് ലാ ലിഗയില് സൂപ്പര് താരം ക്രിസ്റ്റ്യാനോ റൊണാള്ഡോയുടെ ഹാട്രിക്കിന്റെ കരുത്തില് റയല് മാഡ്രിഡിന് ഗംഭീരവിജയം. ഒന്നിനെതിരെ അഞ്ച് ഗോളുകള്ക്ക് റയല് സോസിഡാഡിനെയാണ് മാഡ്രിഡ് തകര്ത്തത്. റയലിന് വേണ്ടി റൊണാള്ഡോയുടെ 23-ാമത് ഹാട്രിക്കാണിത്. ഈ സീസണിലെ മൂന്നാമത്തെയും. ലാ ലിഗയില് ഒക്ടോബര് 30ന് സെവിയക്കെതിരെയും ചാമ്പ്യന്സ് ലീഗില് സപ്തംബര് 17ന് ഗലറ്റ്സരെക്കെതിരെയും റൊണാള്ഡോ ഹാട്രിക്ക് നേടിയിരുന്നു. സപ്തംബര് 6ന് ലോകകപ്പ് യോഗ്യതാ മത്സരത്തില് അയര്ലന്റിനെതിരെ നേടിയ ഹാട്രിക്കും കൂടി ഉള്പ്പെടുമ്പോള് ഈ സീസണില് നേടിയ ഹാട്രിക്കുകളുടെ എണ്ണം നാലായി. റയല് സോസിഡാഡിനെതിരെ കരിം ബെന്സേമയും സമി ഖദീരെയുമാണ് റയലിന്റെ മറ്റ് ഗോളുകള് നേടിയത്.
സോസിഡാഡിനെതിരായ മത്സരത്തിന്റെ 12-ാം മിനിറ്റിലാണ് ക്രിസ്റ്റ്യാനോ ഗോള്വേട്ടക്ക് തുടക്കമിട്ടത്. ഇടതുവിംഗില് നിന്ന് കരിം ബെന്സേമ നേടിയ ക്രോസ് പിടിച്ചെടുത്ത് അസാധ്യമായ ആംഗിളില് നിന്ന് റൊണാള്ഡോ ഉതിര്ത്ത വലംകാലന് ഷോട്ട് സോസിഡാഡ് ഗോളിയെ മറികടന്ന് വലയില് തറച്ചുകയറുകയായിരുന്നു. ഇതിന് മുമ്പ് ആറാം മിനിറ്റില് ക്രിസ്റ്റ്യാനോയുടെ തകര്പ്പന് ലോംഗ്റേഞ്ചര് ക്രോസ്ബാറിലിടിച്ച് മടങ്ങിയിരുന്നു. അഞ്ച് മിനിറ്റിനുശേഷം റയല് ലീഡ് ഉയര്ത്തി. ഇടതുവിംഗില്ക്കൂടി പന്തുമായി കുതിച്ച ക്രിസ്റ്റ്യാനോ റൊണാള്ഡോ സോസിഡാഡ് പ്രതിരോധനിരക്കാര്ക്കിടയിലൂടെ തള്ളിക്കൊടുത്ത പന്ത് കരിം ബെന്സേമ അനായാസം വലയിലെത്തിച്ചു. പിന്നീട് 26-ാം മിനിറ്റില് പെനാല്റ്റിയിലൂടെ ക്രിസ്റ്റ്യാനോ ലീഡ് ഉയര്ത്തി. പന്തുമായി മുന്നേറി സോസിഡാഡ് ബോക്സില് പ്രവേശിച്ചശേഷം ക്രിസ്റ്റ്യാനൊ ഉതിര്ത്ത ഷോട്ട് സോസിഡാഡിന്റെ മാര്ക്കല് ബെര്ഗാരയുടെ കയ്യില് തട്ടിയതിനെതുടര്ന്നാണ് പെനാല്റ്റി ലഭിച്ചത്. ക്രിസ്റ്റ്യാനോ എടുത്ത ഷോട്ട് അനായാസം വലയില് കയറി. 10 മിനിറ്റിനുശേഷം റയല് ലീഡ് നാലാം ഗോളും നേടി. ഗരെത്ത് ബെയ്ല് നല്കിയ പാസില് നിന്ന് സമി ഖദീരെയാണ് റയലിന്റെ ലീഡ് ഉയര്ത്തിയത്. ആദ്യപകുതിയില് റയല് 4-0ന് മുന്നിട്ടുനിന്നു.
രണ്ടാം പകുതി ആരംഭിച്ച് 15 മിനിറ്റ് പിന്നിട്ടപ്പോള് സോസിഡാഡ് ഒരു ഗോള് മടക്കി. മൈതാനമധ്യത്തുനിന്ന് നീട്ടിക്കിട്ടിയ പന്ത് അഡ്വാന്സ് ചെയ്ത് കയറിയ റയല് ഗോളിയുടെ തലയ്ക്ക് മുകളിലൂടെ കോരിയിട്ട് ഗ്രീസ്മാനാണ് റയല് വല കുലുക്കിയത്. 7 മിനിറ്റിനുശേഷം ഗ്രീസ്മാന്റെ മറ്റൊരു ശ്രമം പോസ്റ്റിന് ഉരുമ്മി പുറത്തുപോയി. പിന്നീട് 76-ാംമിനിറ്റില് റയല് തന്റെ ഹാട്രിക്കും റയലിന്റെ അഞ്ചാം ഗോളും നേടി. ബോക്സിന് പുറത്തുനിന്ന് ലഭിച്ച ഫ്രീകിക്കാണ് റൊണാള്ഡോ വലയിലെത്തിച്ചത്. ലാ ലിഗയില് ഈ സീസണില് റൊണാള്ഡോ നേടുന്ന 16-ാം ഗോളായിരുന്നു ഇത്. 13 മത്സരങ്ങളില് നിന്ന് 31പോയിന്റുമായി റയല് മൂന്നാം സ്ഥാനത്ത് തുടരുകയാണ്.
മറ്റ് മത്സരങ്ങളില് റയോ വയ്യക്കാനോ മറുപടിയില്ലാത്ത രണ്ട് ഗോളുകള്ക്ക് സെല്റ്റ ഡി വീഗോയെയും അത്ലറ്റിക് ബില്ബാവോ ഒന്നിനെതിരെരണ്ട് ഗോളുകള്ക്ക് ലവന്റെയെയും പരാജയപ്പെടുത്തിയപ്പോള് എല്ഷെ-ഗറ്റാഫെ പോരാട്ടം ഓരോ ഗോളടിച്ച് സമനിലയില് പിരിഞ്ഞു.
