പാലാ: കിഴതടിയൂര് സര്വ്വീസ് സഹകരണ ബാങ്കിനെ മീനച്ചില് താലൂക്കിലെ ഏറ്റവും മികച്ച സര്വ്വീസ് സഹകരണബാങ്കായി തെരഞ്ഞെടുക്കപ്പെട്ടു. 225 കോടി രൂപ നിക്ഷേപവും 198 കോടി രൂപ വായ്പയുമുള്ള ബാങ്കിന്റെ കുടിശ്ശിക 2 ശതമാനം മാത്രമാണ്. 25 വര്ഷമായി ലാഭത്തില് പ്രവര്ത്തിക്കുന്ന ബാങ്ക് അംഗങ്ങള്ക്ക് 25 ശതമാനം ലാഭവിഹിതം നല്കിവരുന്നു. 2012-13 സാമ്പത്തിക വര്ഷത്തില് ബാങ്കിന്റെ ലാഭം 2.28 കോടിരൂപയാണ്. അത്യാധുനിക സൗകര്യങ്ങളായ എടിഎം, കോര് ബാങ്കിംഗ്, ടെലി ബാങ്കിംഗ്, ആര്ടിജിഎസ്, ഫോറെക്സ് തുടങ്ങിയവ ആരംഭിച്ച കേരളത്തിലെ പ്രഥമ സഹകരണപ്രസ്ഥാനമാണിത്. തിങ്കല് മുതല് ശനി വരെ എല്ലാദിവസവും രാവിലെ 8മുതല് രാത്രി 8 വരെ തുടര്ച്ചയായും ഒരു ബ്രാഞ്ച് ഞായറാഴ്ചയും പ്രവര്ത്തിക്കുന്നു.
ആതുരസേവനരംഗത്ത് മഹനീയമായ പ്രവര്ത്തനമാണ് ബാങ്ക് കാഴ്ചവയ്ക്കുന്നത്. 24 മണിക്കൂറും സേവനം ചെയ്യുന്ന ആംബുലന്സ് സര്വ്വീസ്, രണ്ട് മെഡിക്കല് സ്റ്റോറുകള്, അത്യാധുനിക സൗകര്യങ്ങളോടുകൂടിയ രണ്ടു ഡയഗ്നോസ്റ്റിക് സെന്ററുകള് എന്നിവയിലൂടെ നാളിതുവരെ 6 കോടി രൂപയുടെ ഇളവ് നല്കാന് ബാങ്കിന് കഴിഞ്ഞു.
പരിചയസമ്പന്നരും വിദഗ്ദ്ധരുമായ ഡോക്ടര്മാരുടെ സേവനം ലഭിക്കുന്ന സി.ടി.സ്കാന്, ഡയാലിസിസ് യൂണിറ്റ് എന്നിവയും ബാങ്കിന്റെ നേതൃത്വത്തില് പ്രവര്ത്തിക്കുന്നു. ഡയാലിസിസിന് ചെലവേറിയ സാഹചര്യത്തില് കിസ്കോ ഡയാലിസിസ് സെന്ററില് 400 രൂപ മുതല് 750 രൂപ വരെ മാത്രമാണ് ഈടാക്കുന്നത്. വിദഗ്ദ്ധരായ നെഫ്രോളജി ഡോക്ടര്മാരുടെ സേവനവും ഇവിടെ ലഭ്യമാകുന്നു. ദന്തല് ഒപിജി, മാമ്മോഗ്രാം തുടങ്ങിയവയും ആരംഭിച്ചിട്ടുണ്ട്.
ഫര്ണിച്ചര് മാര്ട്ടുകള്, ഔഷധി, ബിസിനസ് ആന്റ് കോഫീ സെന്റര്, കണ്സ്യൂമര് സ്റ്റോര്, അഗ്രോഷോപ്പ്, ലൈബ്രറി, കിസ്കോ ഫിഷ് മാര്ട്ട്, ഡയറിഫാം, പുരുഷ വനിതാ സ്വാശ്രയസംഘങ്ങള്, ഫാര്മേഴ്സ് ക്ലബ്ബ്, നിര്ധന രോഗികള്ക്ക് സൗജന്യമരുന്ന് വിതരണം, നിരാലംബര്കക് ഒരുനേരം സൗജന്യഭക്ഷണം എന്നിവയും ബാങ്കിന്റെ കീഴില് പ്രവര്ത്തിക്കുന്നു.
