വാഷിങ്‌ടണ്‍: അമേരിക്കയിലെ കണക്ടിക്കട്ടില്‍ ട്രെയിനുകള്‍ കൂട്ടിയിടിച്ച് അറുപതോളം പേര്ക്ക് പരിക്കേറ്റു. ഇതില്‍ മൂന്നു പേരുടെ നില ഗുരുതരമാണ്. അമേരിക്കന്‍ സമയം വെള്ളിയാഴ്ച വൈകിട്ട് ആറു മണിക്ക് ഫെയര്‍ഫീല്‍ഡ്‌ നഗരത്തിലായിരുന്നു അപകടം.
അപകടത്തെ തുടര്‍ന്ന് ന്യൂയോര്‍ക്ക്‌- ബോസ്റ്റണ്‍ പാതയിലെ റെയില്‍ഗതാഗതം തടസപ്പെട്ടു. ന്യൂയോര്‍ക്കില്‍ നിന്ന് 80 കിലോമീറ്റര്‍ വടക്ക് സബര്‍ബന്‍ ടൗണായ ഫെയര്‍ഫീല്‍ഡില്‍ കിഴക്ക് ദിശയിലേക്ക് സഞ്ചരിക്കുകയായിരുന്ന ട്രെയിന്‍ പാളം തെറ്റി സമീപത്തുള്ള ട്രാക്കിലൂടെ സഞ്ചരിക്കുകയായിരുന്ന ട്രെയിനില്‍ ഇടിച്ചാണ് അപകടമുണ്ടായതെന്ന് മെട്രോപൊളീറ്റന്‍ ട്രാന്‍സിറ്റ് അതോറിറ്റി അറിയിച്ചു.
തീവണ്ടി പാളം തെറ്റാനുള്ള കാരണം പരിശോധിച്ചുകൊണ്ടിരിക്കുകയാണെന്ന്‌ അധികൃതര്‍ അറിയിച്ചു. താരതമ്യേന തിരക്ക് കൂടുതലുള്ള വൈകുന്നേരമാണ് അപകടം നടന്നത്. ഒരു ട്രെയിനില്‍ 300 ആളുകള്‍ വരെയുണ്ടായിരുന്നെന്ന് അധികൃതര്‍ പറയുന്നു.
