പെരുമ്പാവൂര്: ട്യൂഷന് സെന്ററില് പഠിക്കുന്ന 13 കാരിയുടെ പ്രണയ വിവരം പെണ്കുട്ടിയുടെ വീട്ടിലറിയിച്ചതിന് കാമുകന്റെ സുഹൃത്തുക്കള് അധ്യാപകനെ വെട്ടിപ്പരിക്കേല്പ്പിച്ച സംഭവത്തില് പ്രതികള് തീവ്രവാദ ബന്ധമുള്ളവരെന്ന് സംശയമുയരുന്നു. ചൊവ്വാഴ്ച രാത്രി 9.30 ഓടെ തടിയിട്ടപറമ്പ് ഉണ്ണിമിശിഹാ പള്ളിക്ക് സമീപത്ത് വച്ചാണ് സംഭവം. ഒരു സുഹൃത്തിന്റെ വീട്ടില് പാന്കാര്ഡിന് അപേക്ഷയും ഫോട്ടോകളും നല്കി സൈക്കിളില് മടങ്ങി വരികയായിരുന്ന മാറമ്പിള്ളി യുപിസ്കൂളിന് സമീപമുള്ള വിശ്വകര്മ്മ ട്യൂഷന് സെന്റര് അദ്ധ്യാപകന് ചെറിയപ്പിള്ളി അജേഷ് (27)നെയാണ് ബൈക്കിലെത്തിയ രണ്ട്പേര് വെട്ടിയത്.
സൈക്കിളില് യാത്രചെയ്യുന്നയാളെ ബൈക്കില് പിന്തുടര്ന്നെത്തി വെട്ടി വീഴ്ത്തിയവര് പരിശീലനം ലഭിച്ച തീവ്രവാദ സംഘടനകളില്പ്പെട്ടവരാണെന്ന് നാട്ടുകാര് പറയുന്നു. അജേഷ് പഠിപ്പിക്കുന്ന ട്യൂഷന് സെന്ററിലെ 13 വയസ്സുള്ള പെണ്കുട്ടിയുമായി വാഴക്കുളം സ്വദേശിയായ ഒരു യുവാവ് പ്രണയത്തിലായ വിവരം പെണ്കുട്ടിയുടെ മാതാപിതാക്കളെ അറിയിച്ചിരുന്നു. ഇതിനെതുടര്ന്ന് കാമുകനും കൂട്ടുകാരും ചേര്ന്ന് കഴിഞ്ഞ ഒക്ടോബര് 27ന് രാത്രിയില് അറക്കത്താഴം പാടത്തിന് സമീപത്ത് അജേഷിനെ തടഞ്ഞ് നിര്ത്തി മര്ദ്ദിച്ച് പരിക്കേല്പ്പിച്ചിരുന്നു.
ഈ വിവരം പോലീസില് അറിയിച്ചിരുന്നുവെങ്കിലും തടിയിട്ടപറമ്പ് പോലീസിന്റെയും പെരുമ്പാവൂര് പോലീസിന്റെയും അതിര്ത്തിയിലാണ് സംഭവമെന്നതിനാല് ഇരുകൂട്ടരും നടപടിയെടുക്കുന്നതില് വീഴ്ച വരുത്തിയതായി അജേഷ് പറഞ്ഞു. ഈ സംഭവത്തില് എന്ഡിഎഫ്, പോപ്പുലര് ഫ്രണ്ട് ബന്ധമുള്ളവരുമുണ്ടന്ന് നാട്ടുകാര് പറയുന്നു. ഇത്തരം തീവ്രവാദ സംഘങ്ങള്ക്കെതിരെ പരാതിപ്പെട്ടാലും പോലീസ് നിഷ്ക്രിയമായ നിലപാടുകളാണ് സ്വീകരിക്കുന്നതെന്നും അജേഷിന്റെ ബന്ധുക്കള് പറയുന്നു.
