തിരുവനന്തപുരം: ലോക ഹൃദയദിനത്തോടനുബന്ധിച്ച് മെഡിട്രീന ആശുപത്രിയും നാലഞ്ചിറ സെന്റ് ജോൺസ് മോഡൽ ഹയർ സെക്കൻഡറി സ്കൂളും ചേർന്ന് രണ്ട് ലോക റെക്കോർഡുകൾ സ്വന്തമാക്കി. 310-ഓളം വിദ്യാർഥികളെ അണിനിരത്തി ഹൃദയത്തിന്റെ ആകൃതിയിൽ മനുഷ്യച്ചങ്ങല രൂപീകരിക്കുകയും ലൈവ് കാർഡിയോ എക്സർസൈസ് സംഘടിപ്പിക്കുകയും ചെയ്തതിനാണ് ആദ്യ റെക്കോർഡ്. മെഡിട്രീന ആശുപത്രി ചെയർമാനും ചീഫ് ഇന്റർവെൻഷണൽ കാർഡിയോളജിസ്റ്റുമായ ഡോ. എൻ. പ്രതാപ് കുമാർ 17 രാജ്യങ്ങളിൽ ഇന്റർവെൻഷണൽ കാർഡിയോളജി നടപടിക്രമങ്ങൾ നടത്തിയതിനാണ് രണ്ടാമത്തെ ലോക റെക്കോർഡ്.
വേൾഡ് റെക്കോർഡ്സ് യൂണിയൻ റെക്കോർഡ്സ് മാനേജർ ക്രിസ്റ്റഫർ ടെയ്‌ലർ ക്രാഫ്റ്റും വേൾഡ് റെക്കോർഡ് ക്യൂറേറ്റർ പ്രജീഷ് നിർഭയയും റെക്കോർഡുകൾ പരിശോധിച്ച് അംഗീകരിച്ചു. തുടർന്ന് ക്രിസ്റ്റഫർ ടെയ്‌ലർ ക്രാഫ്റ്റ് ലോക റെക്കോർഡ് പ്രഖ്യാപനവും സൈറ്റേഷൻ അവതരണവും നടത്തി. ഹൃദയാരോഗ്യ ബോധവൽക്കരണത്തിനും അന്താരാഷ്‌ട്ര തലത്തിലെ ഇന്റർവെൻഷണൽ കാർഡിയോളജി രംഗത്തെ മികവിനും ഒരേസമയം ലഭിച്ച അംഗീകാരമാണ് ഇരട്ട റെക്കോർഡ് നേട്ടമെന്ന് മെഡിട്രീന അധികൃതർ അറിയിച്ചു
