ആലപ്പുഴ: എഴുത്തുകാരനും പ്രാദേശിക ചരിത്രകാരനും ദേശീയ അദ്ധ്യാപക പുരസ്കാര ജേതാവുമായ ആലപ്പുഴ അവലൂക്കുന്ന് വാര്ഡില് തോണ്ടന്കുളങ്ങര ശ്രീവിദ്യയില് കല്ലേലി രാഘവന്പിള്ള (97) അന്തരിച്ചു. ആലപ്പുഴയുടെ ഗുരുനാഥന് എന്ന നിലയില് പ്രശ്സ്തനായിരുന്നു. അദ്ധ്യാപകന്, ഗ്രന്ഥകര്ത്താവ്, സാമൂഹിക സാംസ്ക്കാരിക പ്രവര്ത്തകന് തുടങ്ങിയ നിലകളില് സജീവമായിരുന്നു. ഗാന്ധിസ്മൃതി മണ്ഡപം സ്ഥാപക രക്ഷാധികാരി, ജില്ലാ ശിശുക്ഷേമ സമിതി ഉപാധ്യക്ഷന്, വിദ്യാലയ പരിപോഷക സമിതി ഉപാധ്യക്ഷന്, സര്ഗ കൈരളി അധ്യക്ഷന്, ആകാശവാണി ഉപദേശക സമിതി അംഗം, ജവഹര് ബാലഭവന്റെ സ്ഥാപക ഡയറക്ടര്, ജില്ലാ റോഡ് സുരക്ഷ സമിതിയംഗം, അഴിമതി നിരോധന സമിതിയംഗം, നിയമസഹായ സമിതിയംഗം, ജില്ലാ സാക്ഷരത സമിതിയംഗം, അക്കാദമിക് കൗണ്സില് അധ്യക്ഷന്, ഭവന നിര്മ്മാണ സഹകരണ സംഘം ഡയറക്ടര് തുടങ്ങി വിവിധ പദവികള് വഹിച്ചിരുന്നു.
ഗുരുനാഥന്മാരുടെ ഗുരുനാഥന് എന്നറിയപ്പെട്ടിരുന്ന കല്ലേലി രാഘവന് പിള്ള ദേശീയ അദ്ധ്യാപക അവാര്ഡ് ജേതാവാണ്. എസ്ഡിവി സ്കൂളില് നിന്ന് ഹെഡ്മാസ്റ്ററായാണ് സര്വീസില് നിന്ന് വിരമിച്ചത്. എംഇഎസ് സ്കൂള് പ്രിന്സിപ്പലായും പ്രവര്ത്തിച്ചു. പഠനകാലത്ത് എം.കെ സാനുവും കാവാലം നാരായണപ്പണിക്കരും, കെകെ കുമാരപിള്ളയും സതീര്ത്ഥ്യരായിരുന്നു. 1942 ല് നടന്ന ക്വിറ്റ് ഇന്ത്യ പ്രക്ഷോഭ സമരത്തില് വിദ്യാര്ത്ഥി ഭടനായി പ്രവര്ത്തിച്ചു.
ആത്മകഥയായ നിധയേ സര്വ വിദ്യാനാം, നല്ലകുട്ടി (ബാലസാഹിത്യം), സോക്രട്ടീസിന്റെകൂടെ, മുഖശ്രീ തുടങ്ങി നിരവധി പുസ്കതങ്ങള് രചിച്ചു. 1964 ല് സാഹിത്യ പ്രവര്ത്തക സഹകരണ സംഘത്തില് നിന്നു ബാലസാഹിത്യ പുരസ്കാരം,1985ല് ദേശീയ അധ്യപക പുരസ്കാരം, അഖിലേന്ത്യ ടാഗോര് ശതാബ്ദി പുരസ്കാരം തുടങ്ങിയവ ലഭിച്ചു. റിട്ട. അധ്യാപിക പരേതയായ എന്. വിദ്യാവതിയാണ് ഭാര്യ. മക്കള്: ഡോ.എന്.ആര്.ചിത്ര (റിട്ട.പ്രഫ സെന്റ് ജോസഫ്സ് കോളജ്), എന്.ആര്. ബാലഗോപാലന് ( റിട്ട.ബാങ്ക് ഉദ്യോഗസ്ഥന്, ഹോങ്കോങ്), എന്.ആര്. ശ്രീദേവി (റിട്ട.ഹെഡ്, ജിപിഎന് ഇന്റര്നാഷണല്, കൊച്ചി). മരുമക്കള്: കെ. ജയകുമാര്, ഉര്വശി, വേണുഗോപാല്.
മൃതദേഹം ഇന്ന് രാവിലെ 10 മുതല് അദ്ദേഹം പ്രഥമാധ്യാപകനായിരുന്ന ആലപ്പുഴ എസ്ഡിവി സ്കൂളില് പൊതുദര്ശനത്തിന് വയ്ക്കും. സംസ്കാരം വൈകിട്ട് ചാത്തനാട് പൊതുശ്മശാനത്തില്.
