ന്യൂദല്‍ഹി: ജന്മഭൂമി സംഘടിപ്പിക്കുന്ന ‘വണ്‍ എപിക്, മെനി സ്റ്റോറീസ്: രാമകഥ എക്രോസ് ഭാരത് ആന്‍ഡ് ബിയോണ്ട്’ ത്രിദിന ദേശീയ കോണ്‍ക്ലേവിന്റെ ഉദ്ഘാടനച്ചടങ്ങിന് ആത്മീയപ്രഭ പകരാന്‍ സുകൃതം ഭാഗവത യജ്ഞ സമിതിയും പങ്കാളിയാകും.
സപ്തംബര്‍ 18ന് കൊച്ചി ഭാസ്‌കരീയം കണ്‍വെന്‍ഷന്‍ സെന്ററില്‍ നടക്കുന്ന ചടങ്ങിനോടനുബന്ധിച്ച് ‘സുകൃതം രാമായണാമൃതം’ എന്ന പേരില്‍ 500-ലേറെപേരുടെ നേതൃത്വത്തില്‍ രാമായണപാരായണം സംഘടിപ്പിക്കും. രാവിലെ 10.30 മുതലാണ് ‘രാമായണാമൃതം’ പരിപാടി ആസൂത്രണം ചെയ്തിരിക്കുന്നത്.
കോണ്‍ക്ലേവില്‍ രാജ്യത്തിനകത്തും വിദേശത്തുനിന്നുമുള്ള പ്രമുഖര്‍ പങ്കെടുക്കും. സപ്തംബര്‍ 18 മുതല്‍ 20 വരെ കൊച്ചി ഭാസ്‌കരീയം കണ്‍വെന്‍ഷന്‍ സെന്ററിലാണ് ത്രിദിന ദേശീയ കോണ്‍ക്ലേവ് സംഘടിപ്പിക്കുന്നത്. 18ന് പ്രതിരോധ മന്ത്രി രാജ്നാഥ് സിങ് കോണ്‍ക്ലേവ് ഉദ്ഘാടനം ചെയ്യും.
ജന്മഭൂമി രാമകഥ കോണ്‍ക്ലേവിന്റെ ഔദ്യോഗിക സാംസ്‌കാരിക പങ്കാളിയായ കേന്ദ്ര സാംസ്‌കാരിക മന്ത്രാലയത്തിന് കീഴിലുള്ള സൗത്ത് സോണ്‍ കള്‍ച്ചറല്‍ സെന്ററിന്റെ നേതൃത്വത്തില്‍ നിരവധി കലാകാരന്മാര്‍ കോണ്‍ക്ലേവിന്റെ സാംസ്‌കാരിക സായാഹ്നത്തിലേക്ക് എത്തുന്നുണ്ട്.
