മൂവാറ്റുപുഴ: റേഷന്‍ കടയിലേക്ക് വിതരണത്തിനെത്തിച്ച അരിയില്‍ രണ്ടാം ദിനവും പുഴുക്കളെ കണ്ടെത്തിയതില്‍ ശക്തമായ പ്രതിഷേധം. കല്ലൂര്‍ക്കാടിന് പുറമെ വാഴക്കുളത്തും വിതരണം ചെയ്ത അരിയിലാണ് പുഴുക്കളെ കണ്ടെത്തിയത്. വാഴക്കുളം കല്ലൂര്‍ക്കാട് കവലയിലുള്ള റേഷന്‍ കട നമ്പര്‍ 280ല്‍ ചൊവ്വാഴ്ച വൈകിട്ടും, ബുധനാഴ്ചയും എത്തിച്ച കുത്തരിയിലാണ് പുഴുവിന്റെ സാന്നിധ്യം കണ്ടത്.
അരി ഇറക്കുന്നതിനിടെ ചുമട്ടുതൊഴിലാളികളാണ് പുഴുവിന്റെ സാന്നിധ്യം കടയുടമയുടെ ശ്രദ്ധയില്‍പ്പെടുത്തിയത്. ഏതാനും ചാക്കുകള്‍ വാഹനത്തില്‍ നിന്നിറക്കിയിരുന്നു. അരി താഴെ വീഴുന്നത് നീക്കം ചെയ്യാനായി വിരിച്ചിട്ട പ്ലാസ്റ്റിക് ഷീറ്റില്‍ പുഴു അരിക്കുന്നത് കണ്ടാണ് ചാക്കുകള്‍ പരിശോധിച്ചത്. പിന്നാലെ തുറന്നു പരിശോധിച്ച ചാക്കുകളിലും പുഴുക്കളെ കണ്ടെത്തുകയായിരുന്നു.
കല്ലൂര്‍ക്കാട് 251-ാം നമ്പര്‍ റേഷന്‍ കടയില്‍ ചൊവ്വാഴ്ച വിതരണം ചെയ്ത അരിയില്‍ പുഴുക്കള്‍ കണ്ടെത്തിയിരുന്നു. പിന്നാലെ അരി മുഴുവന്‍ തിരിച്ചെടുത്ത് തൃക്കളത്തൂര്‍ എന്‍എഫ്എസ്എ ഗോഡൗണില്‍ തിരികെ എത്തിച്ചു. തുടര്‍ന്ന് ബുധനാഴ്ച എത്തിച്ച പുതിയ ലോഡ് അരിയിലും പുഴുക്കളെ കണ്ടെത്തുകയായിരുന്നു. വാഴക്കുളത്തും വേങ്ങച്ചുവട്ടിലെ പൊതു വിതരണ കേന്ദ്രത്തിലും വിതരണം ചെയ്യാനായിരുന്നു എന്‍എസ്എഫ്എ ഗോഡൗണില്‍ നിന്ന് അരി എത്തിച്ചത്. നാട്ടുകാര്‍ സംഘടിച്ചതിനെ തുടര്‍ന്ന് ഇറക്കിയ അരി തിരികെ വാഹനത്തിലേക്ക് കയറ്റി.
താലൂക്ക് സപ്ലൈ ഓഫീസറും പോലീസും സ്ഥലത്തെത്തി അരി പരിശോധിച്ചു. നിലവാരമുള്ള അരി എത്തിക്കുമെന്ന ഉറപ്പില്‍ കടയില്‍ ഇറക്കാന്‍ കൊണ്ടുവന്ന അരി മടക്കി അയച്ചു. സാധാരണക്കാര്‍ക്ക് ഉപയോഗിക്കുന്നതിനായി നല്‍കുന്ന റേഷന്‍ അരിയില്‍ പുഴുവിനെ കണ്ടെത്തിയത് അതീവ ഗൗരവമുള്ള വിഷയമായാണ് നാട്ടുകാര്‍ പറയുന്നത്. ഭക്ഷ്യ വകുപ്പിന്റെ അനാസ്ഥയും അശ്രദ്ധയും ജാഗ്രതക്കുറവുമാണ് ഇതിന് കാരണമെന്നാണ് പരാതി.
ജൂലൈ മാസത്തില്‍ പെരുമ്പാവൂരിലുള്ള അരി വിതരണ കമ്പനികള്‍ നല്‍കിയ അരിയിലാണ് പുഴുക്കളെ കണ്ടെത്തിയത്. മഴ കാരണമോ വേണ്ടത്ര ഉണക്ക് ലഭിക്കാത്തതുകൊണ്ടോ ഉണ്ടായ ഈര്‍പ്പ കൂടുതല്‍ കൊണ്ടായിരിക്കും അരി കേടാവാന്‍ കാരണമെന്നാണ് പ്രാഥമിക വിലയിരുത്തല്‍. അരിയില്‍ പുഴുക്കളെ കണ്ടെത്തിയതിന് പിന്നാലെ സംസ്ഥാന ഭക്ഷ്യ കമ്മിഷന്‍ അംഗം അഡ്വ. കെ.എന്‍. സുഗതന്‍ തൃക്കളത്തൂരിലെ എന്‍എഫ്എസ്എ ഗോഡൗണില്‍ പരിശോധന നടത്തി. ജില്ലാ സപ്ലൈ ഓഫീസര്‍ വി.ആര്‍. ഷാജി, താലൂക്ക് സപ്ലൈ ഓഫീസര്‍ കെ.പി. എബി എന്നിവരും പരിശോധനയില്‍ പങ്കെടുത്തു.
പുഴുക്കളുടെ സാന്നിധ്യം കണ്ടെത്തിയ 835 ചാക്ക് അരി വിതരണ കമ്പനികളോട് തിരിച്ചെടുക്കുവാന്‍ നിര്‍ദേശിച്ചു. 1400 ചാക്ക് അരി സിവില്‍ സപ്ലൈയിസ് ക്വാളിറ്റി കണ്ട്രോള്‍ വിഭാഗത്തിന്റെ വിദഗ്ധ പരിശോധനയ്‌ക്ക് ശേഷം മാത്രം വിതരണം ചെയ്താല്‍ മതിയെന്നും കേടായ അരി വിതരണം ചെയ്യരുതെന്നും ഭക്ഷ്യ കമ്മിഷന്‍ നിര്‍ദേശിച്ചു. ഇത് സംബന്ധിച്ച് വിശദമായ റിപ്പോര്‍ട്ട് ഭക്ഷ്യകമ്മിഷന്‍ വകുപ്പ് മന്ത്രി അനൂപ് ജേക്കബിന് നല്‍കിയതായും അഡ്വ. കെ.എന്‍. സുഗതന്‍ അറിയിച്ചു.
