കോട്ടയം: ചെക്കുകേസില്‍ മാണി സി. കാപ്പനെതിരെ നിയമനടപടികളുമായി മുന്നോട്ട് പോകുമെന്ന് പരാതിക്കാരനായ പ്രവാസി വ്യവസായി ദിനേശ് മേനോന്‍ വ്യക്തമാക്കി. തന്‌റെ ജീവന് ഭീഷണിയുണ്ടെന്നും തട്ടിക്കളയുമെന്ന് കാപ്പന്‍ പറഞ്ഞതായും ദിനേശ് മേനോന്‍ ആരോപിച്ചു.
എം.എല്‍.എ സ്ഥാനത്ത് തുടരാന്‍ മാണി സി. കാപ്പന്‍ യോഗ്യനല്ല. കാപ്പനെ അയോഗ്യനാക്കണമെന്ന് ആവശ്യപ്പെട്ട് സ്പീക്കര്‍ക്ക് കത്തു നല്‍കിയതായും അദ്ദേഹം അറിയിച്ചു. എംഎല്‍എക്ക് മൂന്നര വര്‍ഷത്തെ തടവ് ശിക്ഷയുള്ളതായും ശിക്ഷ ഒരുമിച്ച് അനുഭവിക്കാന്‍ കോടതി ഉത്തരവില്ലെന്നും കത്തില്‍ പറയുന്നു.
മുംബൈ വ്യവസായി ദിനേശ് മേനോന്റെ പരാതിയില്‍ മുംബൈ ബോറിവാലി മജിസ്‌ട്രേറ്റ് കോടതിയാണ് മാണി സി കാപ്പനെ ശിക്ഷിച്ചത്. നാലു കേസുകളിലായി 5.3 കോടി രൂപ പലിശസഹിതം നഷ്ടപരിഹാരം നല്‍കണമെന്നും കോടതി ഉത്തരവുണ്ട്.
