ന്യൂദല്‍ഹി: വ്യാജ പോസ്റ്റുകള്‍ സമൂഹമാധ്യമങ്ങളില്‍ പങ്കുവെയ്‌ക്കാന്‍ മടിയില്ലാതെ സിജെപി നേതാക്കള്‍. തുടര്‍ച്ചയായി രണ്ട് വ്യാജ പോസ്റ്റുകളാണ് അഭിജിത് ദിപ്‌കെ, സൗരവ് ദാസ്, അശുതോഷ് രങ്ക മൂവര്‍ സംഘം സമൂഹമാധ്യമത്തില്‍ പങ്കുവെച്ചത്. അതില്‍ ഒന്നാമത്തേത് അയോധ്യ ക്ഷേത്രത്തിന്റെ സിഇഒ ആയി തെരഞ്ഞെടുക്കപ്പെട്ട ജിതേന്ദ്ര സിങ്ങ് മദ്യപിച്ച് നൃത്തം ചെയ്യുന്ന വീഡിയോ ആയിരുന്നു. ഇത് എഐ ഉപയോഗിച്ച് സൃഷ്ടിച്ചതാണെന്ന് ബോധ്യമായി.
മറ്റൊന്ന് ബിജെപി വക്താവ് ഗൗരവ് ഭാട്ടിയയെ തകര്‍ക്കാനും ദല്‍ഹിയിലെ ബിജെപിയെ തകര്‍ക്കാനും ഉദ്ദേശിച്ചുള്ള പോസ്റ്റാണ്. ഇതില്‍ ഗൗരവ് ഭാട്ടിയയുടെ വ്യാജ ചിത്രവും വ്യാജപ്രസ്താവനയും
ആണ് ഉപയോഗിച്ചത്. സ്വതന്ത്ര മഹാരാജിനെ ദിമാഗി നക്സല്‍ എന്ന് ഗൗരവ് ഭാട്ടിയ വിളിച്ചു എന്നായിരുന്നു സൗരവ് ദാസിന്റെ പോസ്റ്റ്. ഈ വ്യാജ എഐ ഫോട്ടോയും വ്യാജ പോസ്റ്റും പിന്‍വലിക്കണമെന്നും നിരുപാധികം മാപ്പു പറയണമെന്നും സൗരവ് ദാസിനോട് ഗൗരവ് ഭാട്ടിയ ആവശ്യപ്പെട്ടിരുന്നു.
എന്നാല്‍ സൗരവ് ദാസിന്റെ ഭാഗത്ത് നിന്നും യാതൊരു നടപടിയുമുണ്ടായില്ല. ഇതില്‍ പ്രകോപിതനായ ഗൗരവ് ഭാട്ടിയ രണ്ടാമത്തെ താക്കീത് നല്കി. ഇക്കുറി അടുത്ത 50 മിനിറ്റിനകം തന്റെ വ്യാജചിത്രം പിന്‍വലിച്ച് നിരുപാധികം മാപ്പ് പറഞ്ഞില്ലെങ്കില്‍ നിയമപരമായ പ്രത്യാഘാതം അനുഭവിക്കേണ്ടിവരുമെന്ന് ഭീഷണി മുഴക്കി. സംഗതി ഗൗരവമാണെന്ന് കണ്ടതോടെ സൗരവ് ദാസ് ഈ ഫോട്ടോ പിന്‍വലിച്ച് മാപ്പ് പറഞ്ഞു. തുടര്‍ച്ചയായ ഈ രണ്ട് സംഭവങ്ങള്‍ സിജെപിയുടെ വിശ്വാസ്യത കളഞ്ഞുകുളിച്ചിരിക്കുകയാണ്.
