ശ്രീഹരിക്കോട്ട: ഇഒഎസ്-05 വിജയകരമായി ഭ്രമണപഥത്തിലെത്തിയതായി സ്ഥിരീകരിച്ച് ഐഎസ്ആര്‍ഒ ചെയര്‍മാന്‍ ഡോ. വി. നാരായണന്. ഭാരതത്തിന്റെ ബഹിരാകാശ പദ്ധതിക്ക് ഈ ദൗത്യം സുപ്രധാന നേട്ടമാണെന്ന് അദ്ദേഹം വിക്ഷേപണത്തിന് ശേഷം നടത്തിയ വാര്‍ത്താസമ്മേളനത്തില്‍ പറഞ്ഞു.
ഇത് ഐഎസ്ആര്‍ഒ സംഘത്തിന്റെയും മറ്റ് വ്യവസായ പങ്കാളികളുടെയും കൂട്ടായ പരിശ്രമത്തിന്റെയും കഠിനാധ്വാനത്തിന്റെയും വിജയമാണെന്നും വി. നാരായണന് അഭിപ്രായപ്പെട്ടു. രാജ്യത്തിന്റെ ബഹിരാകാശ രംഗത്തെ വലിയ നേട്ടമാണിതെന്നും അദ്ദേഹം എടുത്തുപറഞ്ഞു.
‘ഈ സാമ്പത്തിക വര്‍ഷം പ്രധാനമന്ത്രിയുടെ നിര്‍ദേശപ്രകാരം ആറ് വിക്ഷേപണങ്ങള്‍ കൂടി ഞങ്ങള്‍ ലക്ഷ്യമിടുന്നുണ്ട്’ നാരായണന് വ്യക്തമാക്കി. ഗഗന്‍യാനെക്കുറിച്ച് പരാമര്‍ശിച്ച ഐഎസ്ആര്‍ഒ ചെയര്‍മാന്‍ പദ്ധതിക്ക് വേണ്ടിയുള്ള പ്രവര്‍ത്തനങ്ങള്‍ പൂര്‍ത്തിയായിട്ടുണ്ടെന്നും മനുഷ്യനെ ബഹിരാകാശത്തേക്ക് അയയ്‌ക്കുന്നതിനുള്ള ഒരുക്കങ്ങള്‍ പുരോഗമിക്കുകയാണെന്നും അദ്ദേഹം കൂട്ടിച്ചേര്‍ത്തു. തമിഴ്‌നാട്ടിലെ കുലശേഖരപട്ടണത്ത് വരാനിരിക്കുന്ന വിക്ഷേപണ സൗകര്യത്തെക്കുറിച്ചും അദ്ദേഹം വിശദാംശങ്ങള്‍ പങ്കുവെച്ചു. അടുത്ത വര്‍ഷം മാര്‍ച്ചോടെ തയാറാകുമെന്ന് അദ്ദേഹം പറഞ്ഞു.
‘ഐഎസ്ആര്‍ഒയുടെ വളര്‍ച്ച മാത്രമല്ല, നമ്മുടെ രാജ്യത്തെ ബഹിരാകാശ ആവാസവ്യവസ്ഥയുടെ വളര്‍ച്ചയും ആവശ്യമാണ്.’ വി. നാരായണന് പറഞ്ഞു. രാജ്യത്തിന്റെ ഭാവി ബഹിരാകാശ ദൗത്യങ്ങളെക്കിച്ച് വിശദീകരിച്ച അദ്ദേഹം നിലവില്‍ 440 ഓളം സ്റ്റാര്‍ട്ടപ്പ് കമ്പനികള്‍ പ്രവര്‍ത്തിക്കുന്നുണ്ടെന്നും വ്യവസായത്തിന്റെ വികസനത്തിനും തൊഴിലവസരങ്ങള്‍ നല്‍കുന്നതിനും ഇവ സംഭാവന നല്‍കുന്നുണ്ടെന്നും അദ്ദേഹം ചൂണ്ടിക്കാട്ടി.
ജിഎസ്എല്‍വി – എഫ്17 വിക്ഷേപണം നേരില്‍ കാണാന്‍ നിരവധി വിദ്യാര്‍ത്ഥികളും അദ്ധ്യാപകരും ബഹിരാകാശ പ്രേമികളുമാണ് ശ്രീഹരിക്കോട്ടയിലെ സതീഷ് ധവാന്‍ ബഹിരാകാശ കേന്ദ്രത്തില്‍ എത്തിയത്. അഞ്ച് വര്‍ഷങ്ങള്‍ക്ക് ശേഷമുള്ള ഐഎസ്ആര്‍ഒയുടെ തിരിച്ചുവരവാണ് ഈ ദൗത്യത്തിലൂടെ സാധ്യമായത്.
