തൃശൂര്: ഭാരത സര്ക്കാരിന്റെ കൃഷി, കര്ഷകക്ഷേമ മന്ത്രാലയത്തിന് കീഴിലുള്ള കുമിഴ് മരത്തിന്റെ ഡി.യു.എസ് പരിശോധനാ മാര്ഗനിര്ദ്ദേശങ്ങള് വികസിപ്പിക്കുന്നതിനുള്ള ടാസ്ക് ഫോഴ്സ് കമ്മിറ്റിയുടെ ചെയര്പേഴ്സണായി പീച്ചി വന ഗവേഷണ കേന്ദ്രം ഡയറക്ടര് ഡോ. കണ്ണന് സി.എസ്. വാര്യരെ നിയമിച്ചു.
ഒരു പുതിയ സസ്യ ഇനത്തിന് ബൗദ്ധിക സ്വത്തവകാശ സംരക്ഷണം നല്കുന്നതിന് മുന്പ് നടത്തുന്ന നിര്ബന്ധിത പരിശോധനയാണിത്. പുതിയ സസ്യ ഇനം നിലവിലുള്ള മറ്റേതൊരു ഇനത്തില് നിന്നും വ്യക്തമായി വേര്തിരിച്ചറിയാന് കഴിയുന്നതായിരിക്കണം. ഇലയുടെ ആകൃതി, പൂവിന്റെ നിറം അല്ലെങ്കില് ചെടിയുടെ ഉയരം എന്നിവയില് ഏതെങ്കിലും ഒന്നിലെങ്കിലും പ്രകടമായ വ്യത്യാസം ഉണ്ടായിരിക്കണം. ആ ഇനത്തിലെ എല്ലാ ചെടികളും അവയുടെ പ്രധാന സവിശേഷതകളില് ഒരേപോലെയുള്ളവ ആയിരിക്കണം. തുടര്ച്ചയായ കൃഷിക്ക് ശേഷവും ഈ സസ്യ ഇനത്തിന്റെ അടിസ്ഥാന സവിശേഷതകളില് മാറ്റമുണ്ടാകരുത്. അടുത്ത തലമുറകളിലേക്ക് വിത്തുകളോ തണ്ടുകളോ വഴി വംശവര്ദ്ധനവ് നടത്തുമ്പോഴും ഇതിന്റെ ഗുണങ്ങള് സ്ഥിരമായി നിലനില്ക്കണം. സസ്യ ഇനങ്ങള് വികസിപ്പിക്കുന്നവര്ക്ക് അവകാശങ്ങള് നല്കുന്നതിനുള്ള ശാസ്ത്രീയ അടിത്തറയാണിത്.
അതിവേഗം വളരുന്നതും മികച്ച തടി തരുന്നതുമായ കുമിഴ് മരങ്ങള് വ്യാവസായിക ആവശ്യങ്ങള്ക്കായി വ്യാപകമായി ഉപയോഗിക്കുന്നു. ആയുര്വേദത്തിലെ ‘ദശമൂലത്തില്’ ഉള്പ്പെട്ടിട്ടുള്ളതും വ്യാവസായികമായി ഉയര്ന്ന മൂല്യമുള്ളതുമായ ഈ വൃക്ഷത്തിന്റെ ഗുണനിലവാരം ഉറപ്പാക്കാന് ഇത്തരം നിയമപരമായ മാനദണ്ഡങ്ങള് ആവശ്യമാണ്. ടെസ്റ്റിംഗ് വഴി സാക്ഷ്യപ്പെടുത്തിയ വിത്തുകളും തൈകളും വിപണിയില് എത്തുമ്പോള് വ്യാജ ഇനങ്ങള് തടയപ്പെടുകയും കര്ഷകര്ക്ക് മികച്ച ലാഭം ഉറപ്പാകുകയും ചെയ്യും. കൂടാതെ കര്ഷകര്ക്ക് മികച്ച ഗുണനിലവാരമുള്ളതും വിശ്വസിക്കാവുന്നതുമായ ഇനങ്ങള് ലഭിക്കുന്നതിന് ഇത് വഴിയൊരുക്കും. വിവിധങ്ങളായ വനവല്ക്കരണ പദ്ധതികള്ക്ക് അനുയോജ്യമായ മികച്ച ഇനങ്ങള് തെരഞ്ഞെടുക്കുവാനും ഈ മാര്ഗരേഖ സഹായിക്കും.
ഇന്ത്യയില് ആദ്യമായി ഉപ്പുരസമേറിയ മണ്ണിന് യോജിച്ച കാറ്റാടിയുടെ മൂന്ന് ക്ലോണുകളെ വികസിപ്പിച്ചെടുത്ത് ദേശീയ ശ്രദ്ധ നേടിയ ഡോ. കണ്ണന് വാര്യര്ക്ക് വനശാസ്ത്ര മേഖലയിലെ ഇന്ത്യയിലെ മികച്ച ഗവേഷകനുള്ള ദേശീയ പുരസ്കാരവും, കാവുകളെ പറ്റിയുള്ള സമഗ്ര പഠനത്തിന് ജൈവവൈവിധ്യ മേഖലയിലെ മികച്ച ഗവേഷകനുള്ള ദേശീയ പുരസ്കാരവും, ലോകപ്രശസ്ത ശാസ്ത്ര പ്രസാധകരായ സ്പ്രിംഗര് നേച്ചറിന്റെ മികച്ച എഡിറ്റര്ക്കുള്ള അന്താരാഷ്ട്ര പുരസ്കാരവും ലഭിച്ചിട്ടുണ്ട്. ഡിജിറ്റല് ചിത്രങ്ങള് ഉപയോഗിച്ച് വനത്തോട്ടങ്ങളുടെ വിളവ് നിര്ണയിക്കുന്നതിനുള്ള സാങ്കേതിക വിദ്യ വികസിപ്പിച്ചെടുത്തതിന് സഹപ്രവര്ത്തകര്ക്കൊപ്പം പേറ്റന്റും നേടിയിട്ടുണ്ട്.
