തൃശൂര്‍: ലോക പ്രശസ്ത ശാസ്ത്ര പ്രസാധകരായ സ്പ്രിംഗര്‍ നേച്ചറിന്റെ 2026ലെ മികച്ച എഡിറ്റര്‍ പുരസ്‌കാരം കേരള വനഗവേഷണ കേന്ദ്രം ഡയറക്ടര്‍ ഡോ. കണ്ണന്‍ സി.എസ്. വാര്യര്‍ക്ക്. വനശാസ്ത്ര മേഖലയില്‍ ലോകത്തിലെ മികച്ച പത്ത് ജേണലുകളിലൊന്നായ അഗ്രോഫോറസ്ട്രി സിസ്റ്റത്തിന്റെ ഗവേഷണ മൂല്യം ഉയര്‍ത്തുന്നതിന് നല്‍കിയ സംഭാവനകളെ മുന്‍നിര്‍ത്തിയാണ് പുരസ്‌കാരം.
32 രാജ്യങ്ങളില്‍ നിന്നുള്ള 66 അസോസിയേറ്റ് എഡിറ്റര്‍മാരാണ് അഗ്രോഫോറസ്ട്രി സിസ്റ്റത്തിനുള്ളത്. ഭാരതത്തില്‍ നിന്ന് അഞ്ച് ശാസ്ത്രജ്ഞര്‍ മാത്രമാണ് ഈ പദവിയിലുള്ളത്. 2025ലാണ് ഡോ. കണ്ണന്‍ വാര്യര്‍ അഗ്രോഫോറസ്ട്രി സിസ്റ്റം ജേണലിലേക്ക് തെരഞ്ഞെടുക്കപ്പെട്ടത്. മുന്‍പ് രണ്ട് ദേശീയ പുരസ്‌കാരങ്ങളും അദ്ദേഹത്തെ തേടിയെത്തിയിട്ടുണ്ട്. ആദ്യമായി ഉപ്പുരസമേറിയ മണ്ണിന് യോജിച്ച കാറ്റാടിയുടെ മൂന്ന് ക്ലോണുകളെ വികസിപ്പിച്ചെടുത്തതിന് 2020ല്‍ വനശാസ്ത്ര മേഖലയിലെ രാജ്യത്തെ മികച്ച ഗവേഷകനുള്ള പുരസ്‌കാരവും, ആലപ്പുഴ ജില്ലയിലെ കാവുകളെപ്പറ്റിയുള്ള സമഗ്ര പഠനത്തിന് 2010ലെ ജൈവവൈവിധ്യ മേഖലയില്‍ മികച്ച ഗവേഷകനുള്ള പുരസ്‌കാരവും.
വനശാസ്ത്ര മേഖലയില്‍ നടപ്പിലാക്കിയ പദ്ധതികളെയും, സംഭാവനകളെയും അടിസ്ഥാനമാക്കി കേന്ദ്ര വിദ്യാഭ്യാസ മന്ത്രാലയം ഇദ്ദേഹത്തിന് നല്‍കിയിരിക്കുന്ന വിദ്വാന്‍ സ്‌കോര്‍ പത്തില്‍ പത്താണ്. വനംവകുപ്പിന്റെ ഔദ്യോഗിക തീം സോങ് പി, ജയചന്ദ്രന്‍ ആലപിച്ച കാടറിവ്, 2025ലെ തീം സോങ് വനനീര്, കേന്ദ്ര വനം പരിസ്ഥിതി മന്ത്രാലയത്തിനുവേണ്ടി യജുര്‍വേദത്തെ ആസ്പദമാക്കിയുള്ള പ്രകൃതിവന്ദനം എന്നീ ഗാനങ്ങള്‍ക്ക് ഈണം പകര്‍ന്ന് ശ്രദ്ധനേടിയ അദ്ദേഹം 160ലേറെ പാട്ടുകള്‍ക്ക് സംഗീതം നല്‍കി ആലപിച്ച് കലാരംഗത്തും വ്യക്തിമുദ്ര പതിപ്പിച്ചിട്ടുണ്ട്. ഫോറസ്ട്രിയില്‍ ബിരുദവും, ബിരുദാനന്തര ബിരുദവും ഒന്നാം റാങ്കോടെ പാസായ ഡോ. കണ്ണന്‍ വാര്യര്‍ അഞ്ച് തവണ കേരള കാര്‍ഷിക സര്‍വകലാശാലയുടെ കലാപ്രതിഭയായിരുന്നു.
