കൊല്ലം: ആഴക്കടലില് മത്സ്യബന്ധനത്തിനിറങ്ങുന്ന കൊല്ലത്തെ ആയിരക്കണക്കിന് മത്സ്യത്തൊഴിലാളികളുടെ സുരക്ഷ ഉറപ്പാക്കാന് ലക്ഷ്യമിട്ട് ആരംഭിച്ച ‘നഭ് മിത്ര’ ട്രാന്സ്പോണ്ടര് പദ്ധതി ഇനിയും പൂര്ണതയിലെത്തിയില്ല. പദ്ധതി ആരംഭിച്ച് ഒരു വര്ഷം പിന്നിട്ടിട്ടും എല്ലാ മത്സ്യബന്ധന യാനങ്ങളിലും ട്രാന്സ്പോണ്ടര് സ്ഥാപിക്കാനാകാത്തത് കടലിലെ സുരക്ഷാ സംവിധാനങ്ങളെ ആശങ്കയിലാക്കുന്നു.
കാലാവസ്ഥ പെട്ടെന്ന് മാറുകയും കടല് പ്രക്ഷുബ്ധമാവുകയും ചെയ്യുന്ന സാഹചര്യത്തില് കൃത്യസമയത്ത് മുന്നറിയിപ്പ് ലഭിക്കാത്തത് ആഴക്കടലിലെ മത്സ്യത്തൊഴിലാളികള്ക്ക് വലിയ അപകടസാധ്യതയാണ്.
കേരള തീരത്തുനിന്ന് ആഴക്കടലിലേക്ക് പോകുന്ന 12,000ത്തിലേറെ യാനങ്ങള് ഉള്പ്പെടെ 15,684 യാനങ്ങളിലാണ് ട്രാന്സ്പോണ്ടര് സ്ഥാപിക്കാന് ലക്ഷ്യമിട്ടത്. എന്നാല് ഇതുവരെ 10,570 ട്രാന്സ്പോണ്ടറുകള് മാത്രമാണ് കൈമാറിയത്. ഇതില് 8,915 ബോട്ടുകളില് മാത്രമാണ് സ്ഥാപിക്കാനായത്. കൊല്ലം തീരത്തുനിന്ന് നീണ്ടകര, ശക്തികുളങ്ങര, തങ്കശേരി തുടങ്ങിയ ഹാര്ബറുകള് കേന്ദ്രീകരിച്ച് നൂറുകണക്കിന് യാനങ്ങളാണ് ദിവസവും കടലിലിറങ്ങുന്നത്. ഇവരില് വലിയൊരു വിഭാഗം ആഴക്കടല് മത്സ്യബന്ധനത്തെയും ആശ്രയിക്കുന്നവരാണ്.
ട്രാന്സ്പോണ്ടറില്ല; വയര്ലെസും ‘സീ ഫോണും’ ആശ്രയം
ട്രാന്സ്പോണ്ടര് സ്ഥാപിക്കാത്ത ബോട്ടുകള് ഇപ്പോഴും വയര്ലെസ് സംവിധാനത്തെയാണ് പ്രധാനമായും ആശ്രയിക്കുന്നത്. ചില മത്സ്യത്തൊഴിലാളികള് സ്വന്തം നിലയില് സാറ്റലൈറ്റ് ബന്ധമുള്ള ‘സീ ഫോണ്’ ഉപയോഗിക്കുന്നുണ്ട്. ആഴക്കടലില്നിന്ന് കരയിലേക്ക് ബന്ധപ്പെടാന് ഇത് സഹായിക്കുമെങ്കിലും കരയില്നിന്ന് സീ ഫോണിലേക്ക് തിരിച്ചുവിളിക്കാന് കഴിയില്ല.
കടലില് മത്സ്യത്തൊഴിലാളികളുടെ സുരക്ഷ കൂടുതല് പ്രാധാന്യമര്ഹിക്കുന്ന സാഹചര്യത്തില് എല്ലാ യാനങ്ങളിലും ‘നഭ് മിത്ര’ സംവിധാനം അടിയന്തരമായി സ്ഥാപിക്കണമെന്നാണ് മത്സ്യത്തൊഴിലാളികളുടെ ആവശ്യം. കൊല്ലം തീരത്തെ ആഴക്കടല് മത്സ്യബന്ധന മേഖലയിലും പദ്ധതി പൂര്ണമായി നടപ്പാക്കുന്നത് ദുരന്തസാഹചര്യങ്ങളില് നിര്ണായക സുരക്ഷാകവചമാകുമെന്നാണ് വിലയിരുത്തല്.
കടലില് മണിക്കൂറുകള്; മുന്നറിയിപ്പ് നിര്ണായകം
കടലില് കാലാവസ്ഥ മോശമായാല് ബോട്ടുകള്ക്ക് കരയിലെത്താന് മണിക്കൂറുകള് വേണ്ടിവരും. ഈ സാഹചര്യത്തില് ചുഴലിക്കാറ്റ്, ശക്തമായ കാറ്റ്, കടല്ക്ഷോഭം എന്നിവ സംബന്ധിച്ച മുന്നറിയിപ്പുകള് നേരത്തേ ലഭിക്കുന്നത് ജീവന് രക്ഷിക്കാന് നിര്ണായകമാണ്. ഐഎസ്ആര്ഒ വികസിപ്പിച്ച ട്രാന്സ്പോണ്ടര് ‘നഭ് മിത്ര’ ആപ്പുമായി ബന്ധിപ്പിച്ചാണ് പ്രവര്ത്തിക്കുന്നത്. ബോട്ടിന്റെ സ്ഥാനം, സഞ്ചാരദിശ, വേഗത എന്നിവയ്ക്കൊപ്പം ചുഴലിക്കാറ്റിന്റെ സ്ഥാനം, കാറ്റിന്റെ വേഗത, കടല്സ്ഥിതി തുടങ്ങിയ വിവരങ്ങളും ഇതിലൂടെ ലഭിക്കും. മുന്നറിയിപ്പുകള് ബോട്ടിലുള്ളവരുടെ മൊബൈല് ഫോണുകളിലേക്കും എത്തും.
കേന്ദ്രസര്ക്കാര് സൗജന്യമായി നല്കുന്ന ട്രാന്സ്പോണ്ടറുകള് സംസ്ഥാന ഫിഷറീസ് വകുപ്പാണ് ബോട്ടുകളില് സ്ഥാപിക്കുന്നത്. ഐഎസ്ആര്ഒയില്നിന്ന് ചിപ്പുകള് ലഭിക്കുന്നതിനനുസരിച്ചാണ് നടപടികള് മുന്നോട്ടുപോകുന്നത്. സ്വകാര്യ ഏജന്സികള് വഴിയാണ് ഹാര്ബറുകളില് ബോട്ടുകളില് ഉപകരണം സ്ഥാപിക്കുന്നത്. എന്നാല് വിതരണം ചെയ്ത ഉപകരണങ്ങളുടെ മുഴുവന് എണ്ണവും ബോട്ടുകളില് എത്തിക്കാനായിട്ടില്ല.
