തിരുവനന്തപുരം: ഓണാവധി കഴിഞ്ഞ് മടങ്ങുന്നവർക്കായി മംഗളൂരുവിൽ നിന്ന് ബെംഗളൂരുവിലേക്ക് സ്പെഷ്യൽ ട്രെയിൻ പ്രഖ്യാപിച്ചു. യാത്രാ തിരക്ക് കണക്കിലെടുത്ത് വൺവേ സ്പെഷ്യൽ ട്രെയിനാണ് പ്രഖ്യാപിച്ചിരിക്കുന്നത്. മംഗളൂരു ജങ്ഷനിൽ നിന്ന് നാളെ (ശനിയാഴ്ച) രാവിലെ 11:15ന് പുറപ്പെടുന്ന ട്രെയിൻ ഞായറാഴ്ച പുലർച്ചെ 04:00 മണിയ്ക്കാണ് ബെംഗളൂരുവിലെത്തുക.
കാസർകോട് 11:54, കാഞ്ഞങ്ങാട് 12:14, നീലേശ്വരം 12:24, പയ്യന്നൂർ 12:45, കണ്ണൂർ 01:27, തലശേരി 01:50, വടകര 02:14, കോഴിക്കോട് 02:57, തിരൂർ 03:34, ഷൊർണൂർ 04:30, പാലക്കാട് 05:30 എന്നിങ്ങനെയാണ് ട്രെയിൻ കേരളത്തിലെ വിവിധ സ്റ്റേഷനുകളിലെത്തുന്ന സമയം. പൊതനൂർ 07:20, തിരുപ്പൂർ 08:18, ഈറോഡ് 09:00, സേലം 10:10, ബംഗാരപ്പേട്ട് 02:11, കൃഷ്ണരാജപുരം 02:54 സ്റ്റേഷനുകൾ പിന്നിട്ടാണ് ട്രെയിൻ എസ്എംവിടി ബെംഗളൂരുവിൽ 04:00 മണിയ്ക്ക് എത്തുക.
ഒരു എസി ടു ടയർ കോച്ച്, 3 എസി ത്രീ ടയർ കോച്ച്, 10 സ്ലീപ്പർ ക്ലാസ് തോച്ച്, നാല് ജനറൽ സെക്കൻഡ് ക്ലാസ് കോച്ച്, രണ്ട് ഭിന്നശേഷി സൗഹൃദ സെക്കൻഡ് ക്ലാസ് കോച്ച് എന്നിങ്ങനെയാണ് സ്പെഷ്യൽ ട്രെയിനിലെ കോച്ചുകൾ. ട്രെയിനിന്റെ ടിക്കറ്റ് റിസർവേഷൻ ആരംഭിച്ചിട്ടുണ്ട്.
ഈ ഓണക്കാലത്ത് 100 ൽ അധികം സ്പെഷ്യൽ ട്രെയിനുകൾ കേരളത്തിന് റെയിൽവേ അനുവദിച്ചിരുന്നു. ബെംഗളൂരുവിൽ നിന്ന് നിരവധി സർവീസുകളാണ് കേരളത്തിലേക്ക് ഷെഡ്യൂൾ ചെയ്തത്. സ്പെഷ്യൽ ട്രെയിനുകളിലെല്ലാം ടിക്കറ്റ് ബുക്കിങ് പൂർത്തിയായതോടെ വലിയ തിരക്കാണ് ട്രെയിനുകളിൽ അനുഭവപ്പെടുന്നത്. ഈ സാഹചര്യത്തിലാണ് വടക്കൻ കേരളത്തിൽ നിന്ന് ബെംഗളൂരുവിലേക്ക് സ്പെഷ്യൽ ട്രെയിൻ പ്രഖ്യാപിച്ചത്.
