കൊച്ചി : ശബരിമല അയ്യപ്പനെയും മാളികപ്പുറത്തമ്മയെയും കുറിച്ച് നിന്ദ്യമായ പരാമര്ശങ്ങള് നടത്തിയ സണ്ണി കപിക്കാടിനെതിരെ നിയമനടപടി ആവശ്യപ്പെട്ട് ബിജെപി സംസ്ഥാന സെക്രട്ടറി പി ശ്യാംരാജ് സംസ്ഥാന പൊലീസ് മേധാവിക്കും കൊച്ചി സിറ്റി പൊലീസ് കമ്മീഷണര്ക്കും പരാതി നല്കി. കപിക്കാട് നടത്തിയ പരാമര്ശങ്ങള് ഹിന്ദു മതവിശ്വാസികളുടെയും ശബരിമല അയ്യപ്പഭക്തരുടെയും മതവികാരങ്ങളെ ആഴത്തില് വേദനിപ്പിക്കുന്നതും അപമാനിക്കുന്നതുമാണെന്ന് പരാതിയില് പറയുന്നു.
ശബരിമല അയ്യപ്പനെയും മാളികപ്പുറത്ത് അമ്മയെയും കോടിക്കണക്കിന് ഭക്തര് അതീവ ഭക്തിയോടും വിശ്വാസത്തോടും കൂടി ആരാധിക്കുന്നവരാണ്. ശബരിമലയിലും പരിസരപ്രദേശങ്ങളിലും നൂറ്റാണ്ടുകളായി താമസിച്ചുവരുന്ന മലയരയ ആദിവാസി സമൂഹത്തിനും അയ്യപ്പനുമായി ചരിത്രപരവും സാംസ്കാരികവും ആത്മീയവുമായ ബന്ധമുണ്ട്. ഈ സമൂഹത്തിന്റെ വിശ്വാസങ്ങളെയും ആരാധനാ പാരമ്പര്യങ്ങളെയും അപമാനിക്കുന്ന തരത്തിലുള്ള പരാമര്ശങ്ങള് ഗൗരവത്തോടെ കാണേണ്ടതാണ്.
അഭിപ്രായ സ്വാതന്ത്ര്യം മറ്റുള്ളവരുടെ മതവിശ്വാസങ്ങളെയും മതവികാരങ്ങളെയും അപമാനിക്കാനുള്ള അവകാശം നല്കുന്നില്ലെന്ന് പരാതിയില് പറയുന്നു.
