ന്യൂഡൽഹി: സംസ്ഥാനത്തിന്റെ ഔദ്യോഗിക പേര് ‘കേരളം’ എന്നാക്കി മാറ്റുന്നതിനുള്ള നടപടികൾ പൂർത്തിയാക്കി കേന്ദ്രസർക്കാർ വിജ്ഞാപനം പുറത്തിറക്കി. പേരുമാറ്റവുമായി ബന്ധപ്പെട്ട നിയമം ഇന്ന് മുതൽ പ്രാബല്യത്തിൽ വന്നതായി കേന്ദ്രസർക്കാർ വ്യക്തമാക്കി. ഇതോടെ സംസ്ഥാനത്തിന്റെ പേര് ഔദ്യോഗികമായി ‘കേരളം’ എന്നായി.
പേരുമാറ്റവുമായി ബന്ധപ്പെട്ട അന്തിമ നടപടിക്രമങ്ങൾ പൂർത്തിയാക്കിയതിന്റെ ഭാഗമായാണ് കേന്ദ്രത്തിന്റെ വിജ്ഞാപനം.തിരുവോണത്തിന് തൊട്ടുമുമ്പ് സംസ്ഥാനത്തിന് ഔദ്യോഗികമായി ‘കേരളം’ എന്ന പേര് ലഭിച്ചതും ശ്രദ്ധേയമായി. പേരുമാറ്റത്തോടെ ഔദ്യോഗിക രേഖകളിലും കേന്ദ്രസർക്കാർ നടപടികളിലും സംസ്ഥാനത്തിന്റെ പേര് ‘കേരളം’ എന്നായിരിക്കും ഉപയോഗിക്കുക.
സംസ്ഥാനത്തിന്റെ പേര് ‘കേരളം’ എന്നാക്കി മാറ്റണമെന്ന ആവശ്യവുമായി കേരള സർക്കാർ നേരത്തെ കേന്ദ്രസർക്കാരിനെ സമീപിച്ചിരുന്നു. ഇതുസംബന്ധിച്ച് സംസ്ഥാന നിയമസഭ പ്രമേയം പാസാക്കി കേന്ദ്രത്തിന് കൈമാറിയതോടെയാണ് ഭരണഘടനാപരമായ നടപടികൾക്ക് തുടക്കമായത്.
തുടർന്ന് കേന്ദ്രതലത്തിൽ ആവശ്യമായ നിയമനടപടികളും പരിശോധനകളും പൂർത്തിയാക്കി പേരുമാറ്റത്തിന് അംഗീകാരം നൽകുകയായിരുന്നു. ഇതോടെ ‘കേരളം’ എന്ന പേര് ഔദ്യോഗികമായി പ്രാബല്യത്തിൽ വന്നു.
