കളമശ്ശേരി: തിരുവോണത്തിന്റെ ഐതിഹ്യമുറങ്ങുന്ന ചരിത്രപ്രസിദ്ധമായ തൃക്കാക്കര മഹാക്ഷേത്രത്തിലെ ഉത്സവാഘോഷത്തിന് ഇന്ന് ആറാട്ടോടെ കൊടിയിറങ്ങും. കേരളത്തിന്റെ കാര്ഷിക ഉത്സവമായ ഓണം മലയാളികള് ലോകത്ത് എവിടെയുണ്ടോ അവിടെയെല്ലാം ആഘോഷിക്കുന്നു.
ഓണാഘോഷത്തിന് തുടക്കം തൃക്കാക്കര വാമനമൂര്ത്തി ക്ഷേത്രത്തില് നിന്നാണ്. മുമ്പ് നാട്ടുരാജാക്കന്മാരുടെ ഭരണകാലത്ത് കര്ക്കടക മാസത്തിലെ തിരുവോണം മുതല് ചിങ്ങമാസത്തിലെ തിരുവോണം വരെയായിരുന്നു ആഘോഷിച്ചിരുന്നത്. ഓരോ നാട്ടുരാജാക്കന്മാരും ക്ഷേത്രത്തില് വന്ന് തങ്ങളുടെ പ്രതാപത്തിനനുസരിച്ച് സമര്പ്പണം നടത്തി ആഘോഷിച്ചിരുന്നു.
തൃപ്പൂണിത്തുറയില് നിന്ന് രാജാവ് തൃക്കാക്കര ക്ഷേത്രത്തിലേക്ക് അത്തം നാളില് ഘോഷയാത്രയായി എത്തിയിരുന്നതിന്റെ ഓര്മ പുതുക്കലാണ് തൃപ്പൂണിത്തുറയില് നടക്കുന്ന അത്തച്ചമയ ഘോഷയാത്ര.
പത്തര ഏക്കറില് ഉണ്ടായിരുന്ന ക്ഷേത്രം ടിപ്പുവിന്റെ പടയോട്ടത്തെ തുടര്ന്നാണ് ചുരുങ്ങിയത് എന്ന് പറയുന്നു. ക്ഷേത്ര ചരിത്രത്തെ പറ്റി ശ്രീകോവിലിന് ചുറ്റും വട്ടെഴുത്തും കോലെഴുത്തുമായി ശിലാ ലിഖിത രൂപത്തിലുണ്ട്. ഇടപ്പള്ളി രാജാവിന്റെ അധീനതയില് ഉണ്ടായിരുന്ന ക്ഷേത്രം പിന്നീട് തിരുവിതാംകൂര് ദേവസ്വം ബോര്ഡിന് കൈമാറി. ഇതേത്തുടര്ന്നാണ് ഉത്സവ ആഘോഷം 10 ദിവസമായി ചുരുങ്ങിയത്.
രാജഭരണകാലത്ത് ക്ഷേത്ര ആഘോഷങ്ങളില് പ്രശസ്തമായിരുന്ന തൃക്കാക്കര മഹാക്ഷേത്രത്തിലെ ഉത്സവം അവിടെ ചെന്ന് ആഘോഷിക്കാന് പറ്റാത്തവര്ക്ക് വീടുകളില് തൃക്കാക്കരയപ്പനെ ഉണ്ടാക്കി വച്ച് ആഘോഷിക്കാമെന്ന് സാമൂതിരി രാജാവ് വിളംബരം ഇറക്കിയിരുന്നു. അങ്ങനെയാണ് കേരളക്കരയില് ചിങ്ങ മാസത്തില് 10 ദിവസത്തെ ആഘോഷങ്ങള് ആരംഭിച്ചത്.
ഉത്സവ ആഘോഷത്തിന്റെ ഭാഗമായി ഉത്രാടനാളില് നടന്ന തിരുമുല്ക്കാഴ്ച സമര്പ്പണം കാര്ഷിക കേരളത്തിന്റെ വിളവെടുപ്പിന്റെ പ്രതീകം കൂടിയാണ്. കര്ഷകര് സമര്പ്പിക്കുന്ന വിഭവങ്ങള് കൊണ്ട് തിരുവോണ സദ്യ ഉണ്ടാക്കിയിരുന്ന ഓര്മപുതുക്കലാണ് ഇപ്പോള് നടക്കുന്നത്.
ഭഗവാന് കാര്ഷിക വിഭവങ്ങള് സമര്പ്പിക്കുന്നത് ഐശ്വര്യം കൊണ്ടുവരുമെന്ന വിശ്വാസത്തില് നിരവധി ഭക്തജനങ്ങളാണ് ഇന്നലെ വിഭവങ്ങള് സമര്പ്പിക്കാന് എത്തിയത്.
കളമശ്ശേരി മണ്ഡലം എംഎല്എയും മന്ത്രിയുമായ വി.ഇ. അബ്ദുള് ഗഫൂര് കാഴ്ചക്കുല സമര്പ്പണം നടത്തി. വലിയ വിളക്ക് ദിനമായ ഇന്നലെ ഉത്രാട സദ്യ നടന്നു. ആയിരക്കണക്കിന് ഭക്തജനങ്ങള് ഭഗവാന്റെ സദ്യയിലും പകല് പൂരത്തിലും പങ്കെടുത്തു.
ഇന്ന് രാവിലെ 6.30ന് ദശാവതാരം ചന്ദനം ചാര്ത്ത്. 7.30ന് മഹാബലി എതിരേല്പ്പ്, 8.30ന് ശ്രീബലി, 10. 30ന് തിരുവോണ സദ്യ, വൈകിട്ട് 4.30ന് കൊടിയിറക്കല്. 6ന് ആറാട്ട് എഴുന്നള്ളിപ്പ്, രാത്രി 11ന് എതിരേല്പ്പ്.
