തിരുവനന്തപുരം: കെസിഎല് മൂന്നാം സീസണില് ആദ്യ വിജയവുമായി ട്രിവാണ്ഡ്രം റോയല്സ്. കൊച്ചി ബ്ലൂ ടൈഗേഴ്സിനെ 55 റണ്സിനാണ് റോയല്സ് തോല്പ്പിച്ചത്. ആദ്യം ബാറ്റ് ചെയ്ത ട്രിവാണ്ഡ്രം റോയല്സ് 20 ഓവറില് അഞ്ച് വിക്കറ്റ് നഷ്ടത്തില്് 185 റണ്സെടുത്തു. മറുപടി ബാറ്റിങ്ങിന് ഇറങ്ങിയ കൊച്ചിക്ക് 20 ഓവറില് ഒന്പത് വിക്കറ്റ് നഷ്ടത്തില് 130 റണ്സ് മാത്രമാണ് നേടാനായത്. ബാറ്റിങ്ങിലും ബൗളിങ്ങിലും തിളങ്ങി റോയല്സിന് വിജയമൊരുക്കിയ സിജോമോന് ജോസഫാണ് പ്ലെയര് ഓഫ് ദി മാച്ച്. കൊച്ചിയുടെ തുടര്ച്ചയായ മൂന്നാം തോല്വിയാണിത്.
രണ്ടാം ഓവറില് തന്നെ അഭിഷേക് പി നായരെ നഷ്ടമായെങ്കിലും കൃഷ്ണപ്രസാദും വിഷ്ണു വിനോദും ചേര്ന്ന് റോയല്സിന് ഭേദപ്പെട്ട തുടക്കം നല്കി. 16 പന്തുകളില് രണ്ട് ഫോറും മൂന്ന് സിക്സുമടക്കം 32 റണ്സുമായാണ് വിഷ്ണു വിനോദ് മടങ്ങിയത്. 25 റണ്സെടുത്ത കൃഷ്ണപ്രസാദിനെയും കാര്ത്തിക് തന്നെ മടക്കിയതോടെ റോയല്സ് പ്രതിരോധത്തിലായി.
തുടര്ന്ന് ക്രീസില് ഒത്തുചേര്ന്ന അക്ഷയ് മനോഹറും സിജോമോന് ജോസഫും ചേര്ന്ന നാലാം വിക്കറ്റ് കൂട്ടുകെട്ടാണ് റോയല്സിന്റെ ഇന്നിങ്സില് നിര്ണ്ണായകമായത്. 37 പന്തുകളില് അഞ്ച് ഫോറും രണ്ട് സിക്സുമടക്കമാണ് സിജോമോന് ജോസഫ് 56 റണ്സ് നേടിയത്. മൂന്ന് ഓവറില് 21 റണ്സ് മാത്രം വിട്ടുകൊടുത്ത് മൂന്ന് വിക്കറ്റ് വീഴ്ത്തിയ കാര്ത്തിക് ബി നായരാണ് കൊച്ചിയുടെ ബൗളിങ് നിരയില് തിളങ്ങിയത്.
വലിയ ലക്ഷ്യം പിന്തുടര്ന്ന് കളിക്കാന് ഇറങ്ങിയ കൊച്ചിയുടെ ബാറ്റര്മാര്ക്ക് ഒരു ഘട്ടത്തിലും അവസരത്തിനൊത്ത് ഉയരാനായില്ല. മുഹമ്മദ് ഷാനുവും കാര്ത്തിക് ബി നായരും മാത്രമാണ് രണ്ടക്കം കടന്നത്. സച്ചിന് സുരേഷ് റണ്ണെടുക്കാതെ മടങ്ങി. മുഹമ്മദ് ഷാനു 24 റണ്സെടുത്തപ്പോള് കാര്ത്തിക് 41 റണ്സുമായി പുറത്താകാതെ നിന്നു. റോയല്സിന് വേണ്ടി ശ്രീഹരി നായര്, സിജോമോന് ജോസഫ്, വി അജിത്ത് എന്നിവര് രണ്ട് വിക്കറ്റ് വീതം വീഴ്ത്തി.
