തിരുവനന്തപുരം: തിരക്കിന്റെയും ആഘോഷത്തിന്റെയും ആവേശത്തിന്റെയും കാഴ്‌ച്ചവസന്തമൊരുക്കുന്ന ദിവസങ്ങളായി വന്നെത്തുന്ന ഓണപ്പൂരത്തിന് വര്‍ണക്കളമൊരുക്കി കേരള ക്രിക്കറ്റ് ലീഗ്. ഇന്ന് മുതല്‍ സപ്തംബര്‍ അഞ്ച് വരെ അഞ്ച് വരെ കാര്യവട്ടം ഗ്രീന്‍ഫീല്‍ഡ് അന്താരാഷ്‌ട്ര ക്രിക്കറ്റ് സ്റ്റേഡിയത്തില്‍ കേരള ക്രിക്കറ്റ് ലീഗ് മൂന്നാം സീസണ്‍ പൂരം.
ഇന്ന് ഉച്ചയ്ക്ക് 2.30 ന് ആരംഭിക്കുന്ന ആദ്യ മത്സരത്തില്‍ കരുത്തരായ കാലിക്കറ്റ് ഗ്ലോബ്സ്റ്റാര്‍സ് നേരിടുന്നത് തൃശൂര്‍ ടൈറ്റന്‍സിനെ. ആദ്യ മത്സരത്തിന് ശേഷം വൈകുന്നേരം ആറിന് വര്‍ണ്ണാഭമായ ഉദ്ഘാടന ചടങ്ങുകള്‍.
ദൃശ്യവിരുന്നൊരുക്കി വിനോദ പരിപാടികളും കലാപ്രകടനങ്ങളും അകമ്പടി ചാര്‍ത്തിയാകും ഉദ്ഘാടന ചടങ്ങുകള്‍ പുരോഗമിക്കുക. ചടങ്ങില്‍ കെസിഎ പ്രസിഡന്റ് അഡ്വ.ശ്രീജിത്ത് വി നായര്‍, കെസിഎ സെക്രട്ടറി വിനോദ് എസ് കുമാര്‍, കെസിഎല്‍ ചെയര്‍മാന്‍ നാസിര്‍ മച്ചാന്‍, സിഇഒ മിനു ചിദംബരം, മറ്റു കെസിഎ ബോര്‍ഡ് അംഗങ്ങള്‍ എന്നിവര്‍ പങ്കെടുക്കും.
രാത്രി 7.30 ന് രണ്ടാം മത്സരം ആരംഭിക്കും. നിലവിലെ ചാമ്പ്യന്മാരായ കൊച്ചി ബ്ലൂ ടൈഗേഴ്‌സും ഏരീസ് കൊല്ലം സെയ്ലേഴ്സും തമ്മിലാണ് പോരാട്ടം. ഇത്തവണയും കൊച്ചി ബ്ലൂ ടൈഗേഴ്‌സ്, ഏരീസ് കൊല്ലം സെയ്ലേഴ്സ്, കാലിക്കറ്റ് ഗ്ലോബ്സ്റ്റാര്‍സ്, തൃശൂര്‍ ടൈറ്റന്‍സ്, ട്രിവാന്‍ഡ്രം റോയല്‍സ്, ആലപ്പി റിപ്പിള്‍സ് എന്നീ ആറ് ടീമുകളാണ് കളത്തിലിറങ്ങുന്നത്.
മത്സരങ്ങളുടെ ആവേശത്തിനൊപ്പം കാണികള്‍ക്ക് ഉത്സവപ്രതീതി സമ്മാനിക്കുന്നതിനായി ഇന്ന് മുതല്‍ സ്റ്റേഡിയത്തില്‍ ഫാന്‍ വില്ലേജും ആരംഭിക്കും. ഗ്രീന്‍ഫീല്‍ഡ് സ്റ്റേഡിയത്തിന്റെ അഞ്ചാം ഗേറ്റിന് സമീപം ഒരുക്കിയിരിക്കുന്ന ഫാന്‍ വില്ലേജിലേക്ക് കാണികള്‍ക്ക് പ്രവേശനം സൗജന്യമാണ്. സപ്തംബര്‍ അഞ്ച് വരെ പ്രവര്‍ത്തിക്കുന്ന ഫാന്‍ വില്ലേജില്‍ കുടുംബസമേതം ആസ്വദിക്കാന്‍ കഴിയുന്ന വലിയൊരു ആഘോഷവിരുന്നാണ് ഒരുക്കിയിരിക്കുന്നത്. 360 ഡിഗ്രി ഫോട്ടോബൂത്ത്, ഡിജിറ്റല്‍ കാരിക്കേച്ചര്‍ കൗണ്ടറുകള്‍ എന്നിവയ്‌ക്ക് പുറമെ ആംഗ്രി ബേര്‍ഡ് ഗെയിം, പബ് ജി, ഫീഡ് ദി ക്ലൗണ്‍, സിഗ് സാഗ് സൂപ്പ് തുടങ്ങിയ കാര്‍ണിവല്‍ ഗെയിമുകളും ബാറ്റണ്‍ ക്യാച്ചര്‍, ഭീമന്‍ കണക്റ്റ്-4 തുടങ്ങിയ വിനോദങ്ങളും ഇവിടെയുണ്ട്. ഔദ്യോഗിക ടീം മെര്‍ച്ചന്‍ഡൈസ് സ്റ്റാളുകളും വിപുലമായ ഭക്ഷണശാലകളും വര്‍ണ്ണാഭമായ ദീപാലങ്കാരങ്ങളും ഫാന്‍ വില്ലേജില്‍ സജ്ജമാണ്.
