കുമ്പള: വൈദ്യുതി ബില്ലടയ്ക്കുന്നതിനായി കടം വാങ്ങിയ 5000 രൂപ തിരികെ നല്കാമെന്ന് വിശ്വസിപ്പിച്ച് വ്യാപാരിയെ വീട്ടിലേക്ക് വിളിച്ചുവരുത്തി ഹണിട്രാപ്പില് കുടുക്കിയതായി പരാതി. ബലംപ്രയോഗിച്ച് തടഞ്ഞ് വെച്ച് ഫോട്ടോയും വീഡിയോയും പകര്ത്തി ഭീഷണിപ്പെടുത്തി പണം തട്ടാന് ശ്രമിച്ച കേസില് യുവതി ഉള്പ്പെടെ മൂന്നംഗ സംഘത്തെ പോലീസ് അറസ്റ്റ് ചെയ്തു.
റിസ്വാന (28), റിസ്വാനയുടെ ഭര്ത്താവ് ഹസന് ആസിഫ് (33), ബന്ധുവായ മുഹമ്മദ് സിറാജ് (32) എന്നിവരെയാണ് കഴിഞ്ഞ ദിവസം രാവിലെ പോലീസ് അറസ്റ്റ് ചെയ്തത്. മുട്ടംബങ്കര സ്വദേശിയും വ്യാപാരിയുമായ 64കാരനായ ഖാദര് മുഹമ്മദ് സറാംഗിന്റെ പരാതിയിലാണ് കുമ്പള പോലീസ് കേസെടുത്തത്.
ആഗസ്റ്റ് 16ന് രാത്രി 7.30ഓടെയാണ് കേസിനാസ്പദമായ സംഭവങ്ങളുടെ തുടക്കം. നേരത്തെ കടം വാങ്ങിയ 5000 രൂപ തിരികെ നല്കാമെന്ന് പറഞ്ഞാണ് റിസ്വാന വ്യാപാരിയെ കുബണൂരിലെ വീട്ടിലേക്ക് വിളിച്ചുവരുത്തിയത്. വീട്ടിലെത്തിയ വ്യാപാരിയെ റിസ്വാനയും മറ്റ് രണ്ടുപേരും ചേര്ന്ന് ബലമായി തടഞ്ഞുനിര്ത്തുകയും കിടപ്പുമുറിയിലേക്ക് കൊണ്ടുപോകുകയും ചെയ്തെന്നാണ് പരാതി. തുടര്ന്ന് വ്യാപാരിയുടെ വിവിധ ഫോട്ടോകളും വീഡിയോകളും മൊബൈല് ഫോണില് പകര്ത്തിയതായി പരാതിയില് പറയുന്നു.
ഇതിനുശേഷം വ്യാപാരിയുടെ കൈവശമുണ്ടായിരുന്ന മൊബൈല് ഫോണ്, 1500 രൂപ, കാറിന്റെ താക്കോല് എന്നിവ പ്രതികള് തട്ടിയെടുത്തു. കാറില്നിന്ന് കേരള ബാങ്കിന്റെയും കേരള ഗ്രാമീണ് ബാങ്കിന്റെയും എടിഎം കാര്ഡുകളും 25,000 രൂപ വിലമതിക്കുന്ന സാംസങ് മൊബൈല് ഫോണും ഇവര് എടുത്തതായി പോലീസ് വ്യക്തമാക്കി. തുടര്ന്ന് ഭീഷണിപ്പെടുത്തി എടിഎം പിന് നമ്പര് കൈക്കലാക്കിയെന്നും കാര്ഡ് ഉപയോഗിച്ച് 7200 രൂപ പിന്വലിച്ചതായും പരാതിയില് പറയുന്നു. പിറ്റേ ദിവസം,ആഗസ്റ്റ് 17ന് വൈകിട്ട് മൂന്നാം പ്രതി വ്യാപാരിയുടെ കടയിലെത്തി ഭീഷണിപ്പെടുത്തി 5000 രൂപ കൂടി കൈക്കലാക്കിയെന്നും പോലീസ് വ്യക്തമാക്കുന്നു. ഫോട്ടോകളും വീഡിയോകളും പ്രചരിപ്പിക്കുമെന്ന് ഭീഷണിപ്പെടുത്തി രണ്ട് ലക്ഷം രൂപ ആവശ്യപ്പെട്ടതോടെയാണ് ഇദ്ദേഹം പോലീസില് പരാതി നല്കാന് തയാറായത്.
സംഭവത്തില് 15,200 രൂപയും 25,000 രൂപ വിലവരുന്ന മൊബൈല് ഫോണും ഉള്പ്പെടെ ആകെ 40,200 രൂപയുടെ സ്വത്ത് നഷ്ടപ്പെട്ടതായി പരാതിയില് രേഖപ്പെടുത്തിയിട്ടുണ്ട്. പ്രതികളുടെ ഭീഷണി ഭയന്നാണ് പരാതി നല്കാന് വൈകിയതെന്നും പരാതിയിലുണ്ട്.
