ചണ്ഡീഗഢ്: ബലാത്സംഗക്കേസ് ഒത്തുതീര്പ്പാക്കാന് പഞ്ചാബ് മുഖ്യമന്ത്രിയും എഎപി നേതാവുമായി ഭഗവന്ത് മന്നിന്റെ ഭാര്യ ഗുര്പ്രീത് ഗൗര് അഞ്ച് കോടി രൂപ കൈക്കൂലി ആവശ്യപ്പെട്ടതായി ആരോപണം. ഇതുമായി ബന്ധപ്പെട്ട് ദേശീയ മനുഷ്യാവകാശ കമ്മിഷന് (എന്എച്ച്ആര്സി) പഞ്ചാബ് സര്ക്കാരിനും പോലീസ് മേധാവിക്കും നോട്ടീസ് അയയ്ക്കുകയും അന്വേഷണം ആരംഭിക്കുകയും ചെയ്തു. ഭഗവന്ത് മന് മുഖ്യമന്ത്രി സ്ഥാനം രാജിവെച്ച് അന്വേഷണം നേരിടണമെന്ന് ബിജെപി അടക്കമുള്ള പ്രതിപക്ഷ പാര്ട്ടികള് ആവശ്യപ്പെട്ടു.
പഞ്ചാബ് ആന്ഡ് ഹരിയാന ഹൈക്കോടതിയില്നിന്ന് വിരമിച്ച ജസ്റ്റിസ് രഞ്ജിത് സിങ്ങാണ് ഗുര്പ്രീത് കൗര് കൈക്കൂലി ആവശ്യപ്പെട്ടതായി എന്എച്ച്ആര്സിക്ക് പരാതി നല്കിയത്.
ഗുര്പ്രീത് അഞ്ച് കോടി രൂപ കോഴ വാങ്ങി ബലാത്സംഗ കേസ് ഒതുക്കിതീര്ക്കാന് ശ്രമിച്ചതായി ആരോപിച്ച് പരാതി ലഭിച്ചിട്ടുണ്ടെന്ന് എന്എച്ച്ആര്സി അംഗം പ്രിയാങ്ക് കാനൂംഗോയും വെളിപ്പെടുത്തി. സംസ്ഥാനത്ത് ഇതിനെതിരെ വ്യാപക പ്രതിഷേധം അരങ്ങേറിവരികയാണ്.
എന്നാല് ഗുര്പ്രീത് കൗറിനെതിരേ ആരോപണം ഉന്നയിച്ച ജസ്റ്റിസ് രഞ്ജിത് സിങ് കോണ്ഗ്രസ് എംഎല്എ സുഖ്പാല് സിങ് ഖൈരയുടെ സഹോദരീ ഭര്ത്താവാണെന്നാണ് എഎപി പറയുന്നത്.
